«Բնապահպան ընկերներ արշավելու ենք եկել, Վալեքս մալեքս չգիտենք, մեր Թեղուտը ետ կուզենք», «Կեղծ բնապահպաններ հեռու Թեղուտից»… այս և նման այլ կարգախոսներով այսօր` հունվարի 15 – ին, 200-ից ավելի բնապահպան – ակտիվիստներ արշավ էին կազմակերպել` դեպի Թեղուտ: Արշավախմբին էին միացել նաև կինոռեժիսոր Տիգրան Խզմալյանը, «Ժառանգություն» կուսակցության պատգամավորներ Զարուհի Փոստանջյանը, Ստյոպա Սաֆարյանը, ինչպես նաև երգահան Ռուբեն Հախվերդյանը: Բոլոր լրատվական կայքերը հետևում էին արշավախմբի քայլերին ու ամեն պահի տեղեկացնում այդ մասին: Թեղուտի պաշտպանության խմբի արշավ – ակցիան օնլայն հեռարձակում էին նաև մի շարք լրատվական կայքեր: Ակտիվ էին նաև ֆեյսբուքցիները, հատկապես թեղուտցի ակտիվիստները: Ֆեյսբուքյան «Save Teghut Forest» խմբում պարբերաբար արշավի մասին վերջին նորություններն էին հայտնում Սիրան Գրբոյանը, Սեդա Գրիգորյանը և ուրիշներ: Ըստ Հայկ Բարսեղյանի` խմբում թողած գրառման, ուղիղ հեռարձակմանը միացել է մոտավորապես 1500 մարդ: Վերջին գրառումներից էր henaran.am. –ի նյութը, ըստ որի` «Ճանաչողական այցով Թեղուտի անտառ մեկնած մոտ 300 հայ բնապահպան ակտիվիստները հանդիպել են թեղուտցիների դիմադրությանը: Թեղուտցիներն ու հանքավայրը շահագործող “Վալեքս գրուպի” աշխատակիցներն ակցիայի մասնակիցներին ասել են, որ իրենք գիտեն իրենց իրավունքներն ու նրանց “փրկիչներ” պետք չեն»: Ինչպես երևում է Սեդա Գրիգորյանի պատի գրառումներից, նա նույնպես անհանգստությամբ հետևում է արշավախմբին` չմոռանալով կապ հաստատել խմբի անդամների հետ և հրապարակել վերջին նորությունները: Ժամեր առաջ էլ նրա ֆեյսբուքյան պատին հայտնվել էր հետևյալ գրառումը` «աաաաաաաաաաաա էս արդեն վտանգավոր ա……. Վալեքսը տեղի բնակիչներին հանել ա ակտիվիստների դեմ!!!!!!!!!!!»: «Save Teghut Forest» խմբում գրառումների թիվը հետզհետե ավելանում է:
Տիգրանուհի Թասլակյան
