Aravot.am-ին հասած տեղեկություններով, օրերս ՊԵԿ նախագահ Գագիկ Խաչատրյանը, համակարգը խայտառակելու պատճառաբանությամբ, պաշտոնազրկել է Արթիկի հարկային ոստիկանության պետ Նահապետ Նահապետյանին: Վերջինս, ըստ արթիկցիների, երկար տարիներ զբաղեցրել է Արթիկի հարկային պետի պաշտոնը, Գյումրու նախկին հարկային պետ Լիդա Նանյանի օրոք էլ աշխատել է նաև այս քաղաքում որպես բաժնի պետ, սակայն նրան աշխատանքից ազատել են: Վերջինս մեծ ջանքեր է գործադրել նորից համակարգ վերադառնալու համար ու նրան հաջողվել է մի քանի ամսով զբաղեցնել Արթիկի հարկային ոստիկանապետի պաշտոնը:
Այս ընթացքում գործարարներին անհարկի նեղացնելու համար բազմաթիվ բողոքներ են հղվել նրա դեմ, սակայն ամենացնցողը եղել է անհատ նկարիչների բողոքը, ովքեր նամակ են գրել երկրի նախագահին`զարմանալով, թե ով է տեսել ստեղծագործող մարդու հետևից այդպես ընկնեն:
Մեր աղբյուրների փոխանցմամբ, ՊԵԿ նախագահն իր մոտ է կանչել 43-ամյա Նահապետ Նահապետյանին, մի լավ շշպռել համակարգը խայտառակելու համար ու հարկադրել է ազատման դիմում գրել: Նահապետ Նահապետյանը թեև այլևս աշխատանքի չի ներկայանում, ավելին, նա Արթիկում չէ, բնակարան ունի նաև մայրաքաղաքում ու տեղափոխվել է այնտեղ, այդուհանդերձ, մեր տեղեկություններով, նրա դիմումը դեռևս մակագրված չէ: Այս թեմայի շուրջ առաջիկայում կփորձենք ստանալ ՊԵԿ-ի պաշտոնական պարզաբանումը, թեև ցանկալի է, որ մեր հրապարակմանը արձագանքի նաև Նահապետ Նահապետյանը, որի պաշտոնազրկման մասին լսելուն պես, արթիկցի խանութատերերից ամեն մեկը կասկածում է, թե պատճառը իր բողոքն է եղել:
Նունե ԱՐԵՎՇԱՏՅԱՆ
