Արթիկում 25-ամյա ոստիկանի հետ «ռազբորկաներ» ստեղծած, քրեական հեղինակություն համարվող գետափցի Անուշավան Բաղդասարյանին երեկ Գյումրու Գալուստ Գյուլբենկյանի անվան վիրաբուժական հիվանդանոցից պատգարակով տեղափոխեցին մայրաքաղաքի` կրկեսի մոտ գտնվող կալանավորների հիվանդանոց: Հիշեցնենք, որ մի քանի օր առաջ Անուշավանը իր գետափցի ընկերների հետ միասին գողացել էր ծառայության մեջ գտնվող արթիկցի ոստիկան Լուկաշ Մինասյանին /լուսանկարում/`գցել էր ավտոմեքենան, տարել ծանոթի սրճարան ու նրանից պատիվ էր պահանջել իր խաբված եղբոր համար: Ոստիկանի եղբայրը, ով գտնվում է Ռուսաստանում, աշխատեցրել ու խաբել էր քրեական հեղինակության եղբորը:
Ոստիկանն էլ, դիմելով ինքնապաշտպանության, կրակել էր Անուշավանի ոտքերին, որի պատճառով էլ վերջինս չի կարողանում քայլել: Ինչպես հայտնի, է այս գործը քննվում է ՀՔԾ-ում: Մեր աղբյուրների փոխանցմամբ, նպատակահարմար են գտել ձերբակալել միայն կրիմինալի պարագլխին` Անուշավանին, իսկ նրա շրջապատին` ոստիկանին առևանգած երկու ընկերներին`Մհեր ու Ավթանդիլ Խաչատրյաններին, ազատ են արձակել` անկեղծ ցուցմունք տալու համար:
Անուշավանի դեմ հարուցվել է քրեական գործ` քր. Օրենսգրքի 131 հոդվածով` «մարդուն խաբեությամբ, վստահությունը չարաշահելու, բռնություն կամ բռնություն գործադրելու միջոցով առևանգելու» մեղադրանքով: Սա բավականին ծանր հոդված է` խմբով մարդ առևանգելու դեպքում սպառնում է 4-8 տարի ազատազրկում, իսկ եթե առևանգել է մենակ` 2-5 տարի ազատազրկում: Իրավաբանների ասելով, այս արարքի լրջությունը հասկացել են վերջերս, նոր օրենսգրքով են ծանրացրել պատիժը, այն նախկինում թեթև հոդված էր համարվում:
Ի դեպ, խոսակցություններ են պտտվում այն մասին, որ ոստիկանապետ Վովա Գասպարյանը նպատակադրված է քրեական հեղինակության ոտքերին կրակած ոստիկանին առաջ քաշել. նրան արտահերթ լեյտենանտի կոչում շնորհել ու դարձնել օպեր: Ոստիկան Լուկաշ Միանասյանը այս պահին Արթիկի բաժնի պարեկակապահային ծառայության դասակի ոստիկանության ավագ սերժանտ է, օպեր դառնալու դեպքում վերջինս պիտի զբաղվի քրեական հանցանքների` գողությունների ու տարբեր տեսակի հանցագործությունների բացահայտմամբ, որը բավականին մեծ առաջընթաց է ոստիկանի աշխատանքի տեսանկյունից: Ոստիկանների մեկնաբանմամբ, Վովա Գասպարյանը իր այս քայլով ուզում է մեր երկրում բարձրացնել ոստիկանի վարկաբեկված հեղինակությունը` փորձելով ապացուցել, որ Հայաստանը կրիմինալ երկիր չէ, անձեռնմխելի համարվող հեղինակությունների դեմ էլ պայքար կա և այսուհետ երկրի առանցքային հարցերը ոչ թե կրիմինալն է լուծելու, այլ օրենքի մարդը` ոստիկանը:
Նունե ԱՐԵՎՇԱՏՅԱՆ
