Շիրակի մարզի ապաստարանները եւ հակաճառագայթային թաքստոցները չեն համապատասխանում այսօրվա նորմերին: Մարզի 32 ապաստարաններից եւ հակաճառագայթային թաքստոցներից վերանորոգման է ենթակա 12-ը, մասնակի վերանորոգման՝ 9-ը, դուրսգրման՝ 11-ը:
Հայաստանի Հանրապետության արտակարգ իրավիճակների նախարարության Հայաստանի փրկարար ծառայության Շիրակի մարզային փրկարար վարչության տվյալներով, անցած տարի Շիրակում գրանցվել է 398 արտակարգ դեպք՝ 2010 թվականի 438-ի համեմատությամբ: Այս դեպքերի արդյունքում զոհվել է 29 մարդ (2010 թվականին՝ 34), մարմնական վնասվածքներ ստացել կամ վիրավորվել՝ 263 մարդ (2010 թվականին՝ 302):
Գրանցված 398 դեպքից 335-ը տեխնածին են՝ ընդհանուր դեպքերի 84,2%-ը, որոնց հետեւանքով զոհվել է 18 մարդ, զոհերի 62%-ը: Տեխնածին դեպքերի կեսը՝ 170-ը, հրդեհներ են:
Կարդացեք նաև
Ըստ նույն աղբյուրի, 2010 թվականի համեմատությամբ, 2011 թվականին՝ ամիսների կտրվածքով, մարտ-մայիս՝ հրդեհները հիմնականում նվազում էին: Սակայն հուլիս ամսից սկսած՝ չոր եւ շոգ եղանակի պատճառով գրանցվել է խոտածածկ տարածքների հրդեհների կտրուկ աճ՝ 88 հրդեհ:
2011 թվականին Շիրակում արձանագրվել է ջրահեղձման 5 դեպք (2010թ.՝ 4). մեկական՝ Ձորաշեն եւ Արեգնադեմ գյուղերի լճակներում, իսկ 3 դեպք՝ Վահրամաբերդ գյուղի ջրային տարածքում: 2010-ի չորս դեպքից երկուսը էլի Վահրամաբերդ գյուղի ջրային տարածքում է եղել, ուստի Շիրակի փրկարարները որոշել են 2012թ.-ին ուժեղացնել հսկողությունը հատկապես Վահրամաբերդ գյուղի ջրային տարածքում:
Արտակարգ իրավիճակներին շիրակցիներին պատրաստելու եւ իրազեկվածությունը բարձրացնելու համար Շիրակի մարզային փրկարար վարչությունը անցկացրել է շտաբային ուսումնավարժություններ, օբյեկտային վարժանքներ, հատուկ-տակտիկական վարժանքներ՝ 30 գյուղում եւ կազմակերպել ավելի քան 100 դասախոսություն ու դասընթաց՝ «Բնակչության պաշտպանության միջոցառումների կազմակերպումը ձնաբքի դեպքում», «Բնակչության պաշտպանության միջոցառումների կազմակերպումը երկրաշարժի դեպքում» եւ այլ թեմաներով:
«Առավոտ» օրաթերթ
