Այսօր Aravot.am-ը Ախուրյանի դաշնակցական գյուղապետ Արծրուն Իգիթյանից հետաքրքրվեց` հայտնի օլիգարխ, ԱԺ պատգամավոր Սամվել Ալեքսանյանը վճարու՞մ է արդյոք շաքարի գործարանի համար նախատեսված տեղական հարկերը, թե՞ օգտվելով իր մենաշնորհային դիրքից` «գլուխ է պահում»:
Արծրուն Իգիթյանը ի պատասխան մեր հարցի` հաշվարկ կատարեց ու ասաց. «Նա Ախուրյան համայնքին վճարում է հողահարկ և գույքահարկ` իր սեփականաշնորհած հողի և զբաղեցրած շենք –շինությունների համար, որը կազմում է 350 մլն դրամ, իսկ սրա 0,3 տոկոսը տարեկան մոտավորապես մեկ ու կես միլիոն դրամ է նստում: Մեկ ու կես միլիոնը ի՞նչ փող է Սամվել Ալեքսանյանի համար, որ ուշացնի, ջեբի փող է»: Գյուղապետը նաև հավելեց, որ այդ չնչին գումարը միլիարդատեր պատգամավորը, ըստ օրենքի, կարող է վճարել կես-կես:
Ի դեպ, Ախուրյանի շաքարի գործարանը դարձյալ չի աշխատում. գործազուրկ շիրակցիներին «երկնքից սարեր խոստացող» պատգամավորը երկու ամիս առաջ դարձյալ հարկադիր պարապուրդի ուղարկեց իր մոտ իբրև թե աշխատանքի ընդունված 700 մարդու:
Նունե ԱՐԵՎՇԱՏՅԱՆ
Կարդացեք նաև
