Հունվարի 13-ի առավոտյան «Երեւան Ջուր» ընկերության 1-85 հեռախոսային կենտրոնում սկսեցին ահազանգեր ստացվել Արաբկիր վարչական շրջանից՝ անբավարար ջրամատակարարման վերաբերյալ:
Օպերատիվ կերպով իրականացված ստուգայցի արդյունքում պարզվեց, որ «Կովկասյան» օրվա կարգավորման ջրամբարի (ՕԿՋ) հարակից տարածքի դիտահորում անհայտ անձանց կողմից փակվել էր խոշոր տրամագծի ջրատարի փականը: Ավելին, փականը վնասվել էր, ինչի պատճառով լրացուցիչ դժվարություններ առաջացան ջրամատակարարման վերականգնման ժամանակ:
Ինչպես տեղեկացրեց «Արեւմուտք» շահագործման տնօրինության «Արաբկիր» տեղամասի գլխավոր ճարտարագետ Գաբրիել Մելիքսեթյանը, բնակիչների ապօրինության արդյունքում տուժել է մոտ 5000 բաժանորդ: Ներկայումս Գյուլբենկյան-Կիեւյան փողոցների հատվածի ջրամատակարարումը վերսկսվել է, սակայն համակարգում անհրաժեշտ ճնշում ապահովելու համար կպահանջվի որոշակի ժամանակ, որից հետո միայն նշված տարածքում կվերականգնվի գործող ժամանակացույցը:
Հաշվի առնելով, որ Արաբկիրում նմանատիպ դեպքերը հաճախակի են դարձել, «Երեւան Ջուր» ՓԲԸ-ն կոչ է անում բնակիչներին զերծ մնալ ինքնագործունեությունից եւ հիշեցնում օրենսդրությամբ նախատեսված պատասխանատվության մասին՝ ջրամատակարարման համակարգի բնականոն գործունեությանը խոչընդոտելու համար:
Կարդացեք նաև
«Երեւան Ջուր» ՓԲԸ
հաղորդակցության բաժին
«Առավոտ» օրաթերթ
