Այսօր Կենտրոն եւ Նորք-Մարաշ վարչական շրջանների ընդհանուր իրավասության դատարանում ընդդեմ «Հրապարակ» օրաթերթի՝ փաստաբան Արթուր Գրիգորյանի պատվի, արժանապատվության եւ գործարար համբավի պաշտպանության մասին հայցով նախնական դատական նիստն էր:
Հիշեցնենք, որ Արթուր Գրիգորյանը վիրավորվել էր թերթի էլեկտրոնային կայքում՝ hraparak.am-ում 2011թ.-ի օգոստոսի 10-ին տեղադրված հոդվածի ներքո ընթերցողների թողած մեկնաբանություններից:
Թերթի փաստաբան Գեւորգ Գեւորգյանը Aravot.am-ի հետ զրույցում ասաց, որ նախնական դատաքննության ընթացքում դատավորը մերժել է իրենց միջնորդությունը՝ բացառություն անել ու թերթին ազատել Ա. Գրիգորյանին վիրավորող արտահայտությունների ապացուցելիության պարտավորությունից. «Բացառություն էինք խնդրում, որովհետեւ փաստաբանը վիրավորվել է ոչ թե թերթի հրապարակումից, այլ էլեկտրոնային կայքում տեղ գտած հոդվածի տակ թողած ընթերցողների մեկնաբանություններից»:
Փաստաբանը մտավախություն ունի, որ լրատվամիջոցներին ընթերցողների մեկնաբանությունների համար դատի տալու նախադեպ կարող է ստեղծվել:
Կարդացեք նաև
Մեզ հետ զրույցում հայցվորի փաստաբան Տիգրան Աթանեսյանն ասաց, որ նախնական դատաքննության վերաբերյալ ասելիք չունի:
Դատաքննության օր է նշանակվել փետրվարի 24-ը:
Արփինե ՍԻՄՈՆՅԱՆ
