Հունվարի 16-ին «Կրթությունն առանց սահմանների» կարգախոսի շրջանակում, կքանդվի Երեւանի ճարտարապետության եւ շինարարության ու Հայաստանի պետական ճարտարագիտական համալսարանները (ՀՊՃՀ) միմյանցից տարիներ շարունակ անջատող խորհրդանշական պատը:
ԿԳՆ լրատվական ծառայությունից տեղեկացանք, որ միջոցառմանը կմասնակցի նույնիսկ ՀՀ կրթության եւ գիտության նախարար Արմեն Աշոտյանը:
Aravot.am-ը ՀՊՃՀ ռեկտոր Արա Ավետիսյանից հետաքրքրվեց՝ ինչո՞ւ որոշեցին նման քայլի գնալ, այն էլ հանդիսավորությամբ: «Մենք կարծում ենք, որ կրթական բոլոր ռեսուրսները պիտի անջրպետներ չունենան, այսպես ասած սիմվոլիկ՝ «Կրթություն առանց սահմանների»,-ասաց ռեկտորը:
Մեր հարցին՝ իսկ ի՞նչ են տալիս այդ սիմվոլիկան եւ ձեւականությունը, ի վերջո Բեռլինյան պատը չի քանդվում, պարոն Ավետիսյանը պատասխանեց. «Անձամբ ես հունվարի 16-ին հատուկ հետեւելու եմ արարողությանը: Մենք ենթակառուցվածքներ ունենք, որոնք ուզում ենք համատեղ օգտագործել, օրինակ, թեկուզ ընդհանուր գրադարան: Որպեսզի մի բուհի ուսանողը գա գրադարան, ստիպված պետք է դուրս գա իր բուհից, ներս մտնի մյուս բուհ, որ օգտվի: Ճիշտ է, պատը որպես պատ այնքան էլ դուր չի գալիս շատերին, բայց խորհրդանշական ինչ-որ բան է»,-պատասխանեց Արա Ավետիսյանը:
Կարդացեք նաև
Գոհար ՀԱԿՈԲՅԱՆ
