«Ոսկե գնդակի» հավակնորդ, Մադրիդի «Ռեալի» պորտուգալացի հարձակվող Կրիշտիանու Ռոնալդուին այլուս դուր չեն գալիս «Սանտիագու Բեռնաբեու» ստադիոնի բարձրագոչ ֆուտբոլասերները եւ նոր հարկային քաղաքականությունը: Այդ պատճառով Պիրինեյում նրա մնալը մեծ հարցականի տակ է: Մարիանո Ռախոյի նոր կառավարությունը վերացրել է հարկային օրենսդրության այն սողանցքը, որն արտասահմանցի աշխատողներին, այդ թվում նաեւ՝ պրոֆեսիոնալ մարզիկներին, հնարավորություն էր տալիս մոտ երկու անգամ պակաս՝ 24%, հարկ վճարել, համեմատած բարձր վարձատրվող իսպանացիների հետ: Բայց «Լա լիգայի» աստղերն այսուհետեւ պարտավոր են լինելու պետության գանձարկղ մուծել իրենց եկամուտների 54%-ը: Սա մի կողմից կթանկացնի ֆուտբոլիստների գինը, մյուս կողմից այլեւս ձեռք չի տա, ասենք, նույն Ռոնալդուին, որը Մադրիդում շաբաթական քառորդ միլիոն անգլիական ֆունտ ստերլինգ է վաստակում: Լուրեր են պտտվում, որ պորտուգալացին կարող է տեղափոխվել Անգլիայի առաջնություն, որտեղ հարկային դաշտն անհամեմատ մեղմ է:
ԶԼՄ-ները նշում են, որ Ռոնալդուի հեռանալու պատճառ է նաեւ նրա ու մադրիդցի ֆուտբոլասերների հարաբերությունների միջեւ խորացող անջրպետը: Չնայած, որ պորտուգալացին գոլերով նրանց ուրախացնելու համար ջանքեր չի խնայում, վերջինները, միեւնույն է, դժգոհ են՝ համոզված, որ հարձակվողն ամեն ինչ չի անում մրցաշարային աղյուսակում ոխերիմ մրցակցին՝ «Բարսելոնային», շրջանցելու համար:
Աշոտ ՀԱԿՈԲՅԱՆ
