ԱՄՆ պետքարտուղարի օգնական Ֆիլիպ Գորդոնն ասել է, որ Միացյալ Նահանգները շարունակում են պնդել Հարավային Կովկասի երկրներում ժողովրդավարական բարեփոխումների, մարդու իրավունքների եւ ազատությունների լիակատար հարգանքի անհրաժեշտությունը:
Ինչպես հաղորդում է Մեդիամաքս-ը, ամերիկացի դիվանագետն այդ մասին ասել է հունվարի 11-ին Բեռլինի Կորբեր հիմնադրամում`անդրատլանտյան կապերի մասին ելույթում:
Ֆիլիպ Գորդոնը նշել է, որ ԱՄՆ-ի, ԵՄ-ի եւ այլ միջազգային գործընկերների միասնական ջանքերը թույլ են տվել Կովկասում առաջընթացի հասնել, «չնայած որ, տարածքային վեճերը եւ հետագա քաղաքական եւ տնտեսական բարեփոխումների անհրաժեշտությունը շարունակում են խոչընդոտներ հանդիսանալ առավել մեծ կայունության ապահովման համար»:
«Ամենուրեք տարածաշրջանում մենք կշարունակենք պնդել ժողովրդավարական բարեփոխումների եւ մարդու իրավունքների եւ հիմնարար ազատությունների լիակատար հարգանքի անհրաժեշտությունը», – ասել է Ֆիլիպ Գորդոնը:
Կարդացեք նաև
Պետքարտուղարի օգնականը նշել է, որ ԱՄՆ-ն շարունակում է աջակցել հայ-թուրքական հարաբերությունների բարելավման ուղղված գործընթացին, ինչպես նաեւ «Մինսկի խմբի միջոցով բարձր մակարդակով շարունակում է ներգրավվածությունը, որպեսզի օգնի Հայաստանին եւ Ադրբեջանին գտնել Լեռնային Ղարաբաղի հիմնախնդրի խաղաղ եւ երկարաժամկետ լուծումը»:
