Տավուշի մարզպետարանի տվյալով, 2011 թվականին մարզի գինու եւ կոնյակի գործարանները ընդհանուր առմամբ մթերել են 8011 տոննա խաղող: Դրանից 1500 տոննան ընդունել է «Իջեւանի գինու եւ կոնյակի գործարան» ՓԲԸ-ն: Խաղողը մի քանի ամիս առաջ են ընդունել, սակայն այս գործարանում ընդունված բերքի դիմաց դեռեւս չեն վճարել գյուղացիների մի մասին: Իջեւանի գինու եւ կոնյակի գործարանի տնօրեն Ատոմ Եգորյանը չցանկացավ պատասխանել այն հարցին, թե ընդունած բերքի որ մասի համար իրենք դեռեւս գումարը չեն վճարել, ասելով միայն, որ խաղող մթերած անձանց հետ ունեն պայմանագրեր եւ գումարները վճարում են դրանցում նշված ժամկետներում:
Պարոն Եգորյանն ասաց նաեւ, որ իրենք Տավուշից զատ հումք են ընդունել նաեւ Եղեգնաձորում եւ Արարատյան դաշտում: Նրան հիշեցրի որ Տավուշի մարզում առավել շատ խաղող մթերած «Երևանի կոնյակի գործարան» ընկերության Բերդի մասնաճյուղը, «Բերդավանի գինու գործարան» ընկերությունը, Երեւանի շամպայն գինիների գործարանի Դեբեդավանի մասնաճյուղն ընդունած բերքի դիմաց ժամանակին վճարել են խաղողագործներին: Տնօրենն էլ հակադարձեց, թե իրենք ընդունել են նաեւ այն հումքը, որը հրաժարվել են ընդունել «Երեւանի կոնյակի գործարանի» Բերդի մասնաճյուղում:
Իսկ իջեւանցիները դժգոհում են նաեւ, որ Երեւանում զանազան միջոցառումների հովանավոր «Իջեւանի գինու եւ կոնյակի գործարան» ՓԲԸ-ն զլանում է Իջեւանի գինու գործարանի հսկա շենքի գլխին, միջպետական ճանապարհի եզրին, մի քանի լամպ տեղադրել, ինչի պատճառով Տավուշի մարզկենտրոնի հարավային մուտքը գիշերները խավարի մեջ է հայտնվում:
Ոսկան ՍԱՐԳՍՅԱՆ
