Անցած տարվա հուլիսի 28-ին Լոռու մարզպետ նշանակված Արթուր Նալբանդյանը պաշտոնավարման առաջին օրվանից մի քանի անգամ ու տարբեր առիթներով ասել է. «Կադրային ջարդ չեմ անելու, բայց աշխատանքի մեջ թերացողներին չենք խնայի»:
2012-ի առաջին աշխատանքային խորհրդակցության ժամանակ մարզպետն իր դժգոհությունն արտահայտեց վարչությունների աշխատելաոճից, նշելով, որ նրանց աշխատանքը ձեւական բնույթ է կրում: «Վարչական եւ ֆինանսական ստուգումները լրիվ ձեւական են, մեր հանձնաժողովը որ մտնում ա ինչ որ մի կառույց ստուգելու, էդ մարդիկ պետք է ինչ-որ չափով զգաստանան, չէ՞, Ֆիննախն ու վերստուգիչը գալիս են, լրիվ դողում են, մարզպետարանն է գնում, քեֆ, ուրախություն, ուրիշ ոչ մի բան»,- ասել է Արթուր Նալբանդյանը:
Մարզպետը նկատել է, որ բացթողումները շատ են հատկապես կրթության ոլորտում, պետք է լուրջ վերահսկողություն իրականացնել: Դպրոցներում խորհուրդների աշխատանքը ձեւական է, տնօրենի եւ մանկավարժների ընտրություններն անձնավորված. «Տնօրենն ում ուզի՝ կընտրի, ում ուզի՝ չի ընտրի, շատ դեպքում էլ տնօրենը, չգիտես ինչի, մրցույթը ոնց ուզի կանցկացնի, հետո էլ կասի մարզպետարան պիտի ներկայանամ, թե ում ներկայանում, ես էլ չգիտեմ», – մի առիթով զարմացել է Լոռու մարզպետ Արթուր Նալբանդյանը:
Այս ամիս նախատեսված է Լոռու մարզի խորհրդի այս տարվա առաջին նիստը: Մարզում խոսում են, որ լինելու են պաշտոնանկություններ:
Կարդացեք նաև
Նելլի ԴԱՎԹՅԱՆ
