Ծննդյան տոներին եղեւնիների ապօրինի հատման 3 դեպք է արձանագրվել Գորիսի տարածաշրջանում, որից 2-ի տուգանքի չափն ընդհանուր կազմում է 72 հազար դրամը, մեկինը` դեռ ճշտվում է: Իսկ որսագողության եւ ձկնագողության դեպքեր, ՀՀ բնապահպանության նախարարության բնապահպանական պետական տեսչության Սյունիքի տարածքային բաժնում չեն գրանցվել: Ինչպես տեղեկացնում են տարածքային բաժնից` ձկնորսագողության եւ որսագողության դեպքեր չէին գրանցվել նաեւ 2010-2011-Ծննդյան տոներին: Անցյալ տարի նույն ժամանակահատվածում միայն ապօրինի եղեւնիների հատման 6 դեպք էր գրանցվել:
Ըստ ՀՀ բնապահպանության նախարարության բնապահպանական պետական տեսչության Սյունիքի տարածքային բաժնի պետ Լեւոն Պետրոսյանի, ողջ 2011 թվականի ընթացքում մարզում ընդհանուր առմամբ արձանագրվել էր որսագողության 3 դեպք, ձկնագողության` 13 դեպք եւ անտառխախտման 29 դեպք: Նախորդ տարի բնությանը հասված վնասը կազմել է 16,600 միլիոն դրամ, որից 5 միլիոնը՝ բուսական աշխարհին հասցված վնասն է, 6,792 միլիոնը՝ կենդանական աշխարհին, իսկ մնացածը հողի աղտոտմանը, զավթմանը եւ ջրային պաշարին հասցված վնասն է:
Հիշեցնենք, որ դեկտեմբերի կեսերին Սյունիքի մարզի Սիսիանի անտառտնտեսության աշխատակիցները արձանագրել են ծառահատման դեպք, պարզվել է, որ Սիսիանի քաղաքապետարանի ներկայացուցիչներն են սոճիների 200 ճյուղ եւ 3 հատ գագաթ կտրել եւ անտառապահներին ասել, թե իրենք Սիսիան քաղաքի գլխավոր տոնածառի համար են կտրում եւ ունեն համապատասխան թույլտվություն: Սակայն «Հայանտառ» ՊՈԱԿ-ի անտառների հաշվառման եւ անտառօգտագործման բաժնի պետ Հովիկ Սահակյանն «Առավոտին» տեղեկացրեց, որ իրենք ոչ մեկին չեն տվել ծառ հատելու թույլտվություն: Գրավոր դիմումներ ստացել են ոչ միայն Սիսիանից, այլ նաեւ Մասիս, Գյումրի եւ այլ քաղաքներից, սակայն բոլորին էլ պատասխանել են, որ հնարավոր չէ:
Մերի ՍՈՂՈՄՈՆՅԱՆ
Կարդացեք նաև
