2011-ի սեպտեմբերի 2-ին Նոյեմբերյանում 17-ամյա աղջկա բռնաբարության դեպքի առթիվ քրեական գործ է հարուցվել ՀՀ քրեական օրենսգրքի 138 (բռնաբարություն) հոդվածի հատկանիշներով: Նշանակվել էին մի շարք փորձաքննություններ:Այս գործով կասկածվում են երեք 17-ամյա երիտասարդներ, որոնցից մեկը Նոյեմբերյանի քաղաքապետ Վանուշ Ամիրաղյանի որդին է, մեկն էլ` Նոյեմբերյանի ոստիկանության մի մայորի որդին: Գործով կալանավորվածներ չկան: Գործի քննությունը սեպտեմբերի 8-ին Նոյեմբերյանի ոստիկանության քննչական բաժնից տեղափոխվել էր Գեղարքունիքի մարզի Սեւանի քննչական բաժին:
Այս դեպքի մասին «Առավոտը» գրել է անցած տարվա սեպտեմբերի 6-ին եւ սեպտեմբերի 8-ին:
Սեւանի քննչական բաժնի քննիչ Վահագն Ղարիբյանը «Առավոտին» հայտնեց, որ գործի քննությունը չի ավարտվել, հարուցված քրեական հոդվածի փոփոխություն չկա: Քննիչից հետաքրքրվեցինք նաեւ գործով նշանակված փորձաքննությունների արդյունքներից: Նա ասաց, որ դրանց արդյունքները միանշանակ չեն:
Նոյեմբերյանի քաղաքապետ Վանուշ Ամիրաղյանը մեզ հետ հեռախոսազրույցում ասաց, որ լրագրողների հետ զրույցում ինքն ասել է միայն, որ գործի քննությունն ընթացքի մեջ է:
Կարդացեք նաև
Հավելենք, որ քաղաքապետի որդին` Սերգեյը, սովորում է 12-րդ դասարանում եւ այս տարի մտադիր է դառնալ բուհի ուսանող:
Ոսկան ՍԱՐԳՍՅԱՆ
