ՖԻԴԵ-ի նախագահ Կիրսան Իլյումժինովը «Մայակ» ռադիոկայանի եթերում պատասխանելով իրեն ուղղված հարցերին` խոսել է նաեւ շախմատում ալկոհոլի մասին: «Այդ երկու երեւույթներն անհամատեղելի են: Շախմատում դա խստագույնս արգելված է: Համաձայն միջազգային օլիմպիական խարտիայի, մենք համաձայնագրեր չենք ստորագրում ալկոհոլ եւ ծխախոտ արտադրող կամ գովազդող այն ընկերությունների հետ, որոնք կցանկանային հովանավոր դառնալ: Դրա համար էլ պաշտոնական մրցաշարերում արգելված է, ասենք, շամպայնի գավաթով նստել խաղատախտակի առջեւ: Նման բան լինելու դեպքում տվյալ շախմատիստին անմիջապես պարտություն կգրանցվի: Այ, ընկերական խաղի ժամանակ ուրիշ է. կուզես շամպայն խմիր, կուզես` խորոված կեր», – ասել է ՖԻԴԵ-ի նախագահը: Նա նաեւ հատուկ ընդգծել է, որ շախմատիստների մեջ ոչ մի թմրամոլ չկա:
Հրապարակելով Իլյումժինովի այս հարցազրույցը` «Cess-news.ru»-ն ավելացնում է, որ, ցավոք, պրակտիկայում պատահում է, որ շախմատն ու ալկոհոլը լավ էլ համատեղվում են: Ընդ որում, ոչ միայն սիրողական, այլեւ` բարձր մակարդակներում: Եղել է, որ հեղինակավոր «շվեյցարականում» մրցակիցներից մեկը «բուրել» է սպիրտով:
Մենք էլ հիշեցնենք մի այլ դեպք. Ֆրանսիայի դրոշի ներքո հանդես եկող ռուսաստանցի գրոսմայստեր, 2007 թվականի դասական եւ արագ շախմատի Եվրոպայի չեմպիոն Վլադիսլավ Տկաչովը մի անգամ Հնդկաստանում ընացող միջազգային հեղինակավոր մրցաշարում տուրին ներկայացել էր մի քիչ «գցած» ու ժամացույցը գործի դնելուց 10-15 րոպե հետո՝ 11-րդ քայլին, գլուխը դրել սեղանին ու քնել էր:
Աշոտ ՀԱԿՈԲՅԱՆ
