Հովհաննես Թամամյանն իբրեւ Ոստիկանության քրեական հետախուզության գլխավոր վարչության պետ
«Ֆորում» իրավունքի կենտրոնի ղեկավար Տիգրան Տեր-Եսայանն «Առավոտի» հետ զրույցի ընթացքում հիշեց, որ 2004-ի ապրիլի 2-ին «Ի պաշտպանություն «Ա1+»-ի» ստեղծված կոմիտեն մտադիր էր երթ անցկացնել՝ նշելու «Ա1+»-ի եթերազրկումը. «Մարտից սկսած բավական գրագրություններ եղան, թե արգելվում է, դուրս չգաք…Դե, ակտիվ տարի էր. 2003-ի նախագահական ընտրությունից հետո՝ 2004-ին խնդիր էր դարձել Սահմանադրական դատարանի որոշումը՝ վստահության հանրաքվե անցկացնելու վերաբերյալ: Կենտրոնի ոստիկանապետ Հովհաննես Թամամյանը մարդիկ էր ուղարկում «Ա1+»-ի նախագահ Մեսրոպ Մովսեսյանի մոտ: Կոմիտեի անդամներով՝ 7-8 հոգով, ես, Ավետիք Իշխանյանը, Արամ Աբրահամյանը, Վասակ Դարբինյանը, Նիկոլ Փաշինյանը, Վարդան Հարությունյանը եւ այլն որոշեցինք հանդիպել նրան: Հետաքրքրվեցինք, թե ի՞նչ խնդիր կա՝ մենք դիմել ենք վերադաս ատյանների, քաղաքապետարանին՝ երթի թույլտվություն ստանալու համար: Հովհաննես Թամամյանը պատասխանեց՝ ես միայն ենթարկվում եմ իմ անմիջական շեֆին: Հարցրինք, թե այսինքն՝ Երեւանի՞, թե՞ Հայաստանի՞ ոստիկանապետին: Պատասխանեց՝ ոչ, Քոչարյանին: Ու ցույց տվեց նրա լուսանկարը:
Հովհաննես Թամամյանն իբրեւ կալանավոր
Ուզում եմ հիշեցնել, որ որպես Կենտրոնի ոստիկանապետ՝ Հովհաննես Թամամյանը շատ ագրեսիվ էր իր գործունեության մեջ, վարչական կալանքների եւ այլ առումներով՝ այն աստիճանի, որ գնում ուրիշ շրջաններից բերում՝ բերման էր ենթարկում հանրահավաքների, երթերի մասնակիցներին եւ այլն: Նա իր սահմաններում, լիազորությունների շրջանակներում չէր: Եվ բոլորը գիտեին, որ Թամամյանն իր կարգավիճակով ավելի բարձր էր, քան պետական շատ պաշտոնյաներ:
Եվ հիմա ինձ հետաքրքրում է՝ Ռոբերտ Քոչարյանը գոնե «պերեդաչի» ուղարկո՞ւմ է իրեն»:
Աննա ԻՍՐԱՅԵԼՅԱՆ
