«Անսպասելի էր տեսնել մեկ վայրում այսքան եկեղեցիներ եւ խաչքարեր: Երբ մտա Մայր Աթոռ, մի տեսակ ջերմություն, էներգիա զգացի»,- Aravot.am-ի հետ զրույցում Մայր Աթոռ Սուրբ Էջմիածնից իր տպավորությունները հայտնեց Կովկասի ինստիտուտի ուսանողուհի, ազգությամբ տաջիկ Գուլջահոն Համրոզոդան:
Մինչ հայերը տոնական այս օրերին շարունակում են հյուրեր ընդունել կամ հյուր գնալ, ոմանք էլ` աշխատել, Երեւանի Կովկասի ինստիտուտի օտարերկրացի ուսանողներն այսօր որոշել էին մեկնել Էջմիածին` ավելի լավ ծանոթանալու հայերի պատմությանը, կրոնին ու մայրաքաղաքից դուրս կյանքին:
Ուսանողներն այցելեցին Մայր Աթոռ Սուրբ Էջմիածին, Սուրբ Գայանե, Սուրբ Հռիփսիմե, Սուրբ Շողակաթ եկեղեցիներ:
Ղրղըզստանից` Սալամատ Օրունտաեւին հատկապես հայկական եկեղեցիների ճարտարապետությունն էր գրավել. «Այն նման չէ քրիստոնեական մյուս եկեղեցիներին, քանի որ պահպանվել է այնպես, ինչպես 301 թվականին էր` քրիստոնեությունը ընդունելու ժամանակաշրջանում»:
Կարդացեք նաև
Ճարտարապետական կառույցներով հիացած Գուլջահոնին զարմացրել էին Սուրբ Գայանեի մոտակայքում հավաքված աղբն ու ցեխակույտերը, իսկ ազգությամբ տաջիկ Ֆարանգիզ Բահարիին` մայրաքաղաքից դուրս` դեպի Էջմիածին տանող ճանապարհին խաղատների առատությունը. Տաջիկստանում արգելված է նման խաղատների գոյությունը:
Սբ. Գայանեի բակում մի քանի երիտասարդ աղ էին բերել, որպեսզի քահանան օրհներ եւ մինչ վերջինս աղոթք էր էր անում, երիտասարդները բարձրաձայն ծիծաղում էին: Կովկասի ինստիտուտի Տալղատ Ակիշովն ամեն կերպ փորձում էր հասկանալ նրանց ծիծաղելու պատճառը, բայց հայաստանցի համակուրսեցիներն այդպես էլ չկարողացան բացատրել, թե աղն օրհնելու մեջ ինչն էր ծիծաղելի:
