«Ֆորում» իրավունքի կենտրոնի ղեկավար Տիգրան Տեր Եսայանը 2011 թ. դեկտեմբերի 23-ին դիմել է ՀՀ գլխավոր դատախազին՝ մասնավորապես նշելով, որ ճանաչվել է տուժող անհայտ անձի կողմից 2004 թվականի ապրիլի 30-ին իր բնակարանում կատարված ավազակային հարձակման փաստի առթիվ քրգործով, որը հարուցվել էր Կենտրոնի ոստիկանության քննչական բաժնում. «30.11.2004թ. վարույթն իրականացնող մարմնի կողմից որոշում է կայացվել գործի վարույթը կասեցնելու մասին, հիմք ընդունելով ՀՀ քրեական դատավարության օրենսգրքի 31-րդ հոդվածի 1-ին մասի 1-ին կետը։ Նկատի ունենալով այն, որ այս ժամանակահատվածում ինձ հայտնի են դարձել որոշ հանգամանքներ, որոնք կապված են իմ բնակարանում կատարված ավազակային հարձակման եւ այն կատարած անձանց հետ, ուստի խնդրում եմ հանձնարարել՝ թիվ 13120404 քրեական գործով կասեցված վարույթը վերսկսելու մասին, ինչպես նաեւ խնդրում եմ բացառության կարգով գործի նախաքննության կատարումը հանձնարարել ՀՀ ԿԱ ԱԱԾ քննչական վարչությանը»:
«Առավոտի» խնդրանքով պարզաբանելով, թե ինչու է ցանկանում, որ նախաքննությունը վարի ոչ թե ոստիկանությունը, այլ ԱԱԾ-ն՝ Տիգրան Տեր-Եսայանն ասաց. «Կան կասկածներ, մտահոգություններ, քանի որ կան մարդիկ, որոնք առնչվել են այս քրգործին 2004 թվականին եւ այսօր էլ դեռ համակարգում են, զբաղեցնում են բարձր պաշտոններ: Ուստի ցանկալի չէ, որ այս գործը հիմա էլ լինի իրենց ենթակայության տակ»: Նշենք, որ 2004-ին Կենտրոնի ոստիկանության պետը Հովհաննես Թամամյանն էր
Հիշեցնենք, որ 2004-ին՝ իբրեւ Փաստաբանների միջազգային միության նախագահ, Տիգրան Տեր-Եսայանը ներկայացնում էր ոչ միայն «Ա1+»-ի, այլ նաեւ ընդդիմադիր մի շարք գործիչների շահերը դատարաններում: Եվ օրը ցերեկով կատարված այդ զինված ավազակային հարձակումից երկու ամիս անց մի շարք հասարակական կազմակերպություններ հանդես եկան հայտարարությամբ՝ արձանագրելով, որ նախաքննության մարմինն այս գործի կապակցությամբ տարօրինակ անգործություն է դրսեւորում. «Մենք չենք բացառում, որ ինչպես հանցագործությունը, այնպես էլ նախաքննության մարմնի նման վերաբերմունքը կապված են Տիգրան Տեր–Եսայանի մասնագիտական գործունեության եւ քաղաքացիական դիրքորոշման հետ»:
Ինքը՝ Տիգրան Տեր-Եսայանն այդ ընթացքում զերծ էր մնում մեկնաբանություններից, եւ այժմ էլ ասաց. «Ես երբեւիցե չեմ փորձել իմ ընտանիքի, անձնական խնդիրներս շահարկել այլ նպատակներով: Եվ այժմ էլ չեմ ցանկանում: Պարզապես նշեմ, որ քրեական գործի վարույթը տեւեց մոտ 3-4 ամիս, ու ընթացավ շատ վատ գործընթացով: Առնվազն ակնհայտ էր մասնագիտական անգրագիտությունը, թափթփվածությունը, եթե նույնիսկ չկային շահադիտական նկատառումներ»:
Կարդացեք նաև
Փորձեցինք պարզել նաեւ, թե ինչ նոր հանգամանքներ են այժմ հայտնի դարձել իրեն՝ կապված իր բնակարանում կատարված ավազակային հարձակման եւ այն կատարած անձանց հետ, ինչի մասին գրել էր դիմումում, սակայն Տիգրան Տեր-Եսայանն ասաց. «Չեմ ուզում ժամանակից առաջ անցնել: Չգիտեմ՝ կմերժեն, թե կհարգեն խնդրանքս, որ որպես բացառություն՝ այլ մարմին վարի նախաքննությունը: Բայց վաղ թե ուշ՝ կիմանաք նաեւ այդ մասին»:
Աննա ԻՍՐԱՅԵԼՅԱՆ
Հ. Գ. Ի դեպ, Տիգրան Տեր-Եսայանը մի հետաքրքրական պատմություն ներկայացրեց Հովհաննես Թամամյանի առնչությամբ, որը կներկայացնենք վաղը:
