Այսօր Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մխիթար Պապոյանի նախագահությամբ ժ. 11.30-ից սկսվել է ՀՀ ճանապարհային ոստիկանության նախկին պետ Մարգար Օհանյանի, 2-րդ սպայական գումարտակի հրամանատար Ստեփան Կարախանյանի եւ 2-ի գործով դատաքննությունը:
Դատաքննությունը հետաձգվել է մինչեւ ժ.14.00-ն, քանի որ Մ.Օհանյանի պաշտպանը՝ Մկրտիչ Վասակյանը, միջնորդել է, որպեսզի իր պաշտպանյալի նկատմամբ խափանման միջոցը փոխվի կամ կիրրառվի գրավ մինչեւ 3մլն դրամի չափով:Դատավորը գտնվում է խորհրդակցական սենյակում:
Երբ մեղադրողը՝ ՀՀ գլխավոր դատախազության ավագ դատախազ Հարութ Հարությունյանն առարկեց այս միջնորդության դեմ, Մարգար Օհանյանը դիմեց դատավորին: Նա ասաց, որ ցանկանում է օրենքի շրջանակներում հանդիպել միայն դատավորի եւ դատախազի հետ, առանց լրատվամիջոցների, քանի որ ցանկանում է կարեւոր բան ասել:
Երբ դատավորն ասաց, որ կա ընթացակարգ դռնփակ նիստ անելու համար, պարոն Օհանյանն ասաց, որ լրատվամիջոցներից չի խուսափում, ընդհակառակը՝ ուզում է, որ իր նիստը լուսաբանվի, որպեսզի «Մարդիկ տեսնեն , ինչը ինչից հետո է»: Նա դիմեց դատախազին, ասելով՝«Ուրիշի կռիվը Ձեր վրա մի վերցրեք: Ձեր խղճի առաջ իմ անձնական հարաբերությունները ավարտական փուլի մի հասցրեք այստեղ»:
Կարդացեք նաև
Ապա Մարգար Օհանյանը շարունակեց, թե օգոստոսի 30-ից իր համար ամեն ինչ ավարտվել է (նկատի ունի իր կալանքը):
«Ես որեւէ մեկին չեմ ուզել վիրավորել: Ուզում էի ասել եւ կասեմ էլ, թե իմ դեմ ցուցմունքի համար ում քանի ժամ են պահել, 6-րդ վարչությունից հանել-բերել, հետո ինչ- որ պատգամավոր էր», ասաց Մարգար Օհանյանը՝ դիմելով իր կողքին նստած Ստեփան Կարախանյանին: Ապա դատարանին հայտնեց, թե ինչպես են իրեն մի զանգից հետո վկայից դարձրել ամբաստանյալ:
Ռուզան ՄԻՆԱՍՅԱՆ
Տեսանյութը՝ Գագիկ ՇԱՄՇՅԱՆԻ
