Ամանորի նախօրերին ազատ է արձակվել թմրանյութ օգտագործելու եւ պահելու կասկածանքով ձերբակալված «Շլամ» մականունով Արմեն Մուրադյանը և վերջինիս ընկերը` Ասատուր Աուստամյանը: Այս մասին Slaq.am-ի թղթակցի հետ զրույցում հաստատեցին նաև ոստիկանության լրատվական ծառայությունից:
Հիշեցնենք, որ Շլամ Արմենը ՆԳ նախկին փոխնախարար, ոստիկանության ներքին զորքերի նախկին հրամանատար Գրիգոր Գրիգորյանի (Շերիֆի) մերձավորը լինելուց և Արարատի մարզում թաղային հեղինակություն համարվելուց զատ, մշտապես եղել է ԲՀԿ-ի առանցքային դեմքերից մեկը և հատկապես վերջին ընտրությունների ժամանակ լավագույնս աշխատել է ԲՀԿ-ի օգտին:
Հիշեցնենք նաև, որ 2011-ի նոյեմբերին Արմեն Մուրադյանի ձերբակալությանը հետաքրքիր «զուգադիպությամբ» հաջորդեց Մասիսի քաղաքապետարանի կոմունալ բաժնի պետ Արթուր Ղազարյանին` նույն մեղադրանքով կալանքի վերցնելը, ինչը մեծ աղմուկ հանեց հասարակության, ինչպես նաև քաղաքական ուժերի շրջանում և որակվեց քաղաքական արշավ` ԲՀԿ-ի դեմ:
Մասնավորապես խոսվում էր այն մասին, թե իբր նշված երկու ձերբակալություններով ՀՀ ոստիկանապետ Վլադիմիր Գասպարյանը «կամպանիա» է սկսել ԲՀԿ առաջնորրդ Գագիկ Ծառուկյանի դեմ, ով այդ օրերին իր ծննդյան 55 ամյակը տոնելու առիթով մի շարք նախկին պաշտոնյաների հետ գտնվում էր Էմիրություններում և ըստ լուրերի` այնտեղից զանգով հաշիվ էր պահանջել իր երբեմնի ընկեր, ՀՀ ոստիկանապետ Վլադիմիր Գասպարյանից:
Կարդացեք նաև
Մինչ ոստիկանությունը տարբեր առիթներով կհերքեր այս լուրերը, խափանման միջոց կալանքը փոխվեց բնակավայրից չհեռանալու մասին ստորագրությամբ և նոյեմբերի 17-ին ձերբակալված Մասիսի քաղաքապետարանի ԲՀԿ-ական աշխատակից Արթուր Ղազարյանը դեկտեմբերի 7-ին ազատ արձակվեց: Այնուհետ` օրեր անց, ստորագրությամբ ազատ արձակվեցին «Արարատ ցեմենտ» գործարանի հիմնական իրացնող «Շլամ» մականունով Արմեն Մուրադյանն ու նրա ընկերը` Ասատուր Առուստամյանը: Նրանք մեղադրվում են Քր.օր.-ի 268 հոդվածի 2-րդ մասի հատկանիշներով մեղադրվող (Թմրամիջոցներ կամ հոգեմետ նյութերի ապօրինի շրջանառությունն առանց իրացնելու նպատակի):
