Մեր քաղաքում առաջարկվող ամանորյա զվարճանքներից մեկը դելֆինարիումն է՝ մուլտիպլիկացիոն հայտնի հերոսներ Մաշայի եւ արջի մասնակցությամբ: Այդ երկու ռուսաստանցիները վերջերս շատ հանրահայտ են. դրա՛նք եւ ոչ թե կենդանական աշխարհում ամենաբարձր ինտելեկտ ունեցողներից մեկը՝ չգիտես ինչու մարդուն նվիրվող կաթնասուն դելֆինը:
Դելֆինարիում մտնելուն պես արդեն կազմակերպչական հարցի լուծումը՝ 5 նիշանի սանդղակով կարելի է գնահատել 1-ի: Տոմսերը հարկավոր է գնել նախօրոք: Եվ եթե միջոցառումը սկսվում է ժամը, օրինակ 19-ին, ապա այցելուներին հարկավոր է տեղում լինել արդեն 18:30: Բացի այն, որ մանկական խաղալիքներն ու քաղցրավենիքները կամ ջրեղենը վաճառվում են օդանավակայանի գներով, նախասրահում չկա գոնե մեկ աթոռ՝ կես ժամ սպասելու համար:
Հարկավոր չէ լինել քիմիկոս կամ փորձագետ՝ հասկանալու համար, որ դելֆինները քլորախեղդ են արվում: Չեմ կարծում, որ դելֆիններ պահելու տարրական այլ նորմերն էլ պահպանվում են՝ անզեն աչքով էլ երեւում է, որ շոուի համար նախատեսված լողավազանը շատ փոքր է. այնպիսի տպավորություն է ստեղծվում, թե դելֆինները՝ բարձր արագությամբ լողալիս (որը շոուի մի մասն է) գլուխները խփելու են լողավազանի եզրերին: Ես հասկանում եմ, որ այս ամենը մեծ ծախսերի հետ է կապված, բայց տոմսն արժե 3500 դրամ, իսկ դելֆինի հետ լուսանկարվելը՝ նույնքան: Էլ չեմ ասում, որ այդ գումարի դիմաց տրամադրվում է ընդամենը մեկ նկար, իսկ ֆլեշի վրա ձեր նկաը գցելն արժե 1000 դրամ: Ինչ խոսք, բարձր տեխնոլոգիաները իրոք բարձունքում են:
Կարդացեք նաև
Ի՞նչ ազգության են պատկանում դելֆինները: Միանշանակ՝ ոչ հայ: Շոուի սկսվելու ճիշտ նշանակված ժամին, երբ ոչ հանդիսատեսն էր հավաքվել, ոչ էլ Մաշան ու արջն էին պատրաստ, դելֆինները կամավոր սկսեցին դրվագներ ցուցադրել իրենց ելույթից: «Մաշայի եւ արջուկի մասնակցությամբ» ասվածն էլ նշանակում է 45 րոպե տեւողությամբ տաղտկալի, մանկապարտեզի մակարդակի էլ չձգող, ցածրորակ միջոցառում՝ արջուկի, շշմելու տգեղ, սեւ ու հաստ հոնքերով Մաշայի եւ այլ՝ խղճուկ զգեստներով եւ տեքստերով հերոսների մասնակցությամբ:
Դելֆինների եւ իրենց վարժեցնողների հերոսական ու նվիրյալ աշխատանքը՝ վերոհիշյալ սանդղակով կգնահատեմ 10-ի: Բայց մեր դիլֆինարիումին պիրանիա էլ չէի վստահի:
Մ. ՄԵՐՈՒԺԱՆՅԱՆ
