Առաջին հանդիպման, առաջին պահին` Հովսեփին տեսնելով` Տաթեւը հասկացել է` նա է այն տղամարդը, ում կուզեր իր կողքին տեսնել: Տաթեւն է այդ մասին պատմում: Ասում է` երբեք ոչ մի տղայի նկատմամբ նման զգացում չի ունեցել, իսկ իրենով հետաքրքրվող տղաներ միշտ էլ եղել են:
Տաթեւը Հովսեփին տեսել է ընկերուհու հետ հանդիպման ժամանակ` տղան Տաթեւի ընկուրուհու համակուրսեցին է: Հետո Հովսեփը ֆեյսբուք սոցիալական ցանցում ընկերության առաջարկություն է արել համակուրսեցու ընկերուհուն, վերջինս էլ ընդունել է: «Ես ֆեյսբուքում իմ բոլոր ընկերների հետ շփվում եմ, չեմ սիրում, որ պարզապես թվաքանակ ապահովելու համար են այդքան ընկերներ հավաքում: Հովսեփն արդեն մի քանի օր էր` ֆեյսբուքում ընկերս էր, բայց չէր գրում: Ես առաջինը գրեցի ու զգուշացրի` եթե թվաքանակ ապահովելու համար է ինձ ընկերության առաջարկություն արել, ջնջելու եմ: Այդպես սկսվեց մեր առաջին խոսակցությունը»,- պատմում է Տաթեւը: Հիշում, որ այդուհետ ամեն օր` ամբողջ օրը զրուցում էին` ամեն ինչից, թեմա չկար, որ չեն քննարկել: Հերթական մի օր էլ` քննարկման ժամանակ, Հովսեփը հանդիպելու առաջարկություն է անում. «Ես էլ հայ աղջիկ, մտածեցի` ո՞նց կլինի, ինտերնետային ծանոթություն է, մի հատ էլ հանդիպեմ: Բայց Հովսեփին կարծես հաջողվում էր ինձ համոզել. ասաց, որ տարբերություն չկա, մենք ամեն օր իրար հետ շփվում ենք, խոսում տարբեր թեմաներից, հիմա էլ ցանկանում է իրականում հանդիպել, իրար ճանաչում ենք եւ պետք է վստահենք միմյանց»,- պատմում է Տաթեւը եւ ժպտում, ասում է Հովսեփի այս խոսքերը կարդալուց անմիջապես հետո դուրս է գալիս սոցիալական ցանցից` իր «տեղը զիջելով» եղբորը: Հետո երկար մտածել, որոշել է, նորից կբացի ֆեյսբուքը, եթե Հովսեփը համացանցում լինի, հեռախոսի համարը կգրի, եթե այնտեղ չլինի, ամեն ինչին էլ վերջ կտա: «Նորից մտա, տեսա օն-լայն է, բացի դրանից էլ` մի քանի նամակ է գրել` նախատելով ինձ` ինչի՞ եմ առանց պատասխան տալու դուրս եկել ցանցից: Ես էլ, առանց ուրիշ բառ գրելու, թողեցի հեռախոսիս համարը եւ նորից դուրս եկա ցանցից»,- հիշում է Տաթեւը: Հաջորդ օրն էլ` համալսարանական քննությունից հետո, նրանց առաջին հանդիպումն էր: Տաթեւն ասում է` հենց այդ օրն էլ` Հովսեփին սպասելուց տեսնելով` հասկացել է, որ կուզեր հենց նրան տեսնել իր կողքին: «Երկար խոսեցինք, տարբեր թեմաներ քննարկեցինք, ինչպես մնացած ժամանակները»,- ասում է Տաթեւը: Երկրորդ հանդիպմանն էլ արդեն մոռանում են` իրենք որպես ընկերներ էին ուզում իրար ճանաչել, Հովսեփը միանգամից խոստովանում է, որ զգացմունքներ ունի, Տաթեւն էլ` ոչինչ չի ասում, պարզապես ընդառաջում է Հովսեփի` իր ձեռքը բռնելուն: «Ամեն ինչ շատ արագ ստացվեց, կարծում եմ` նրանից է, որ երկար ժամանակ է` ճանաչում էինք իրար»,- ասում է Տաթեւը:
Հովսեփի եւ Տաթեւի միջեւ սիրային հարաբերություններ սկսելուց որոշ ժամանակ անց տղան գնում է Մոսկվա` Տաթեւն էլ հասկանում է իրավիճակի կարեւորությունը եւ համակերպվում: Արդեն մեկ տարի է, ինչ այնտեղ է, բայց մի քանի անգամ եկել է Հայաստան: «Եթե սիրում ես, հասկանում ես, իհարկե դժվար է հեռավորությանը դիմանալը, կարոտը խեղդում է, բայց քեզ համոզում ես, որ դա քո սիրելիին անհրաժեշտ է»,- ասում է Տաթեւը, անկեղծանում` իր համար զբաղմունք է անընդհատ փնտրում, որ շատ չտարվի զգացմունքով եւ մելանխոլիկ չդառնա: Մոսկվայից առաջին անգամ Հովսեփի գալու մասին էլ չի իմացել: Զանգել են տղայի ընկերները, Տաթեւին ասել, որ Հովսեփը ինչ-որ բան է ուղարկել եւ ցանկանում են փոխանցել, պայմանավորվել են հանդիպման համար: Տղաները մոտեցել են, խոսել Տաթեւի հետ, իսկ նրա մեջքից մոտեցել է Հովսեփը. «Մեծ անակնկալ էր, փաթաթվել էի նրան եւ ուրախությունից բարձր լաց էի լինում»:
Հեռավորության վրա գտնվելու ամենամեծ բարդությունը տարբեր տոներին միմյանց անակնկալներ պատրրաստելն է: Տաթեւն ասում է` Հովսեփին հաջողվում է Մոսկվայից նվերներ ուղարկել եւ այլն. «Բայց ես աղջիկ եմ, իմ գործը ավելի դժվար է», – «նեղվում է» նա, նշում, որ լավ է` համացանցն էլ կա. «Հովսեփի ծննդյան օրը իմ ձեռքով տորթ էի թխել: Իհարկե նա չկերավ իմ պատրաստած տորթը, մենք ` ընտանիքով վայելեցինք, բայց նա նկարը տեսավ, անակնկալն էլ նրա դուրը շատ եկավ»:
Տաթեւն Ամանորին էլ չգիտեր սիրելիին ինչպես անակնկալ մատուցել: Դիմեց «Առավոտ երիտասարդականին», ցանկացավ հրապարակային իր անսահման մեծ սերը խոստովանել Հովսեփին եւ այսպես շնորհավորել նրա Նոր տարին. «Սերը փոխադարձ հարգանք է, վստահություն, իրար հասկանալու կարողություն, ունակություն` սիրելիի աշխատանքը, թերությունները եւ առավելությունները սիրելու,- ասում է Տաթեւը, ավելացնում,- մեր սերը նման է տարվա եղանակին, ամեն տարի փոխվում է` ավելի գեղեցիկ դառնում. գարնան նման միշտ թարմ է, ամռան պես ուրախ, առողջ, աշնան նման ռոմանտիկ, ձմռան պես սթափ»: Սիրելիին ասում է, գիտի` իրենց համարյա բոլոր ցանկությունները համընկնում են , ուզում է` դրանք իրականան եւ խոստովանում սիրելիին. «Վստահ եմ` իմ Ձմեռ պապը դու ես լինելու»:
