Այսօր Շիրակի մարզի ընդհանուր իրավասության դատարանում ավարտվեց ԱԺ փոխնախագահ Սամվել Բալասանյանի ընտանիքին պատկանող Գյումրու գարեջրի գործարանի դիմաց տեղի ունեցած մարդասպանության գործով դատավարությունը:
Հիշեցնենք, որ գարեջրի գործարանի բանվորներից մեկի` Ալբերտ Սահակյանի եղբայրը`Արմենը, դանակահարել էր Բալասանյանի որդու` Միսակի երկու թիկնապահներին, որոնցից մեկը` 28-ամյա Արթուր Առաքելյանը մահացել էր, իսկ Վարդան Ասատրյանը հաշմանդամ դարձել:
Չնայած այս գործով 5 երիտասարդ ամբաստանյալներ կային, սակայն ամենախիստ պատիժը սահմանվեց 26-ամյա Արմեն Սահակյանին: Շիրակի մարզի դատարանի նախագահ Էդուարդ Մանուկյանը, ի նկատի ունենալով, որ ամբաստանյալներից և ոչ մեկը, նախկինում արատավորված չէ, 4-ին համաներում շնորհեց, իսկ սկանդալի գլխավոր հերոսին` Արմեն Սահակյանին` 11 տարվա ազատազրկում: Նշենք, որ վերջինս տառապում է շաքարային դիաբետով և մեկ անչափահաս երեխա ունի: Վճիռը հարպարակելուց հետո դահլիճում բառի իսկական իմաստով ողբ սկսվեց. մարդասպանի հարազատները լուռ մղկտում էին: Դատարանի կարգադրիչները ևս շատ վատ զգալով այդ տեսարանից, մի կերպ կարողացան նրանց համոզել ու դահլիճից հեռացնել:
Կարդացեք նաև
Նունե ԱՐԵՎՇԱՏՅԱՆ
