Դեռևս նախորդ տարի, քերակատարողական հիմնարկների վարչության պետ Աշոտ Գիզիրյանը, մարզպետ նշանակվելուն ու Շիրակ մարզ ոտք դնելուն պես, գյուղապետերին հավաքեց ու հրահանգեց` այլևս չներկայանալ մարզպետարան` առանց փողկապների:
Aravot.am-ն այսօր մարզպետին հիշեցնելով իր հանձնարարականի մասին` հարցրեց, թե հաջողվե՞ց արդյոք Գիզիրյանին գյուղապետերին փողկապ կապել սովորեցնել: «Այո, չտեսա՞ք բոլորը գալստուկներով էին, անգամ մարզիկները, ջահել, սիրուն տեսքով երեխեք են`գաստուկով էին եկել: Իմիջիայլոց գալստուկ կապելու մեջ ինչ վատ բան կա՞, սխա՞լ եմ արել, որ ասել եմ: Գիտեք ինչ, հարցն այն չէ, թե անթրաշ են լինում կամ գալստուկով, երբ որ գալստուկ են կապում, առաջին հերթին ոչ թե համայնքի բնակիչներին են ասում, թե մենք պաշտոնյա ենք, այլ իրենք իրենց նկատմամբ են հարգանք է դրսևորում»,- պատասխանեց նա:
Պարզվում է, որ թեև Շիրակի մարզպետին հաջողվել է 116 գյուղապետերի փողկապներով տեսնել, սակայն չի հաջողվում բոլորին աշխատեցնել: Ըստ պարոն Գիզիրյանի, Տուֆաշենի գյուղապետը հրաժարականի դիմում է գրել, քանի որ չի սիրում աշխատել: Կա նաև մեկ այլ գյուղապետ, որի անուն-ազգանունը մարզպետը չնշեց, սակայն տեղեկացրեց, որ աշխատանքի չի գնում և ենթակա է հեռացման: «Աշխատանքից ազատելն ամենահեշտ ձևն է, ես դա պրոֆիլակտիկ առումով թողնում եմ վերջում, այսինքն մարդուն պետք է փորձես աշխատանքի բերել, կարգի հրավիրել, եթե էդ մարդը չի ուղղվում, նոր պիտի պատժես»,- ասում է մարզպետ Գիզիրյանը:
Նունե ԱՐԵՎՇԱՏՅԱՆ
Կարդացեք նաև
