Տեղեկացրել ենք, որ դեկտեմբերի 27-ին Իջեւանում ձերբակալվել էին եղբայրներ Հովիկ, Շեկո Խեչյանները եւ նրանց հորեղբոր որդի Վարդանը: Խեչյանները ձերբակալվել են այս տարվա հուլիսին Իջեւանի «Արտեմիս» ռեստորանում տեղի ունեցած միջադեպի առնչությամբ:
Իջեւանի «Արտեմիս» ռեստորանում, կերուխումի ժամանակ քեֆի մասնակիցներից մեկը մատուցողուհու նկատմամբ անհարգալից վերաբերմունք էր դրսեւորել, որի պատճառով իջեւանցիների եւ դիլիջանցիների միջեւ վեճ, ծեծկռտուք էր ծագել: Դրանից հետո դիլիջանցիներն «օժանդակ ուժերով», բազմաթիվ ավտոմեքենաներով ժամանել էին Իջեւան, կրակոցներ արձակել, որին ի պատասխան՝ Իջեւան քաղաքի բազմաբնակարան շենքերի մեկից նրանց ուղղությամբ որսորդական հրացանից կրակոց էր արձակվել: Այս կապակցությամբ ՀՀ քրեական օրենսգրքի 258 հոդվածի 3-րդ մասով քրեական գործ է հարուցված՝ «Խուլիգանություն, որը կատարվել է մի խումբ անձանց կամ կազմակերպված խմբի կողմից»: Պատիժը՝ մինչեւ 7 տարի ազատազրկում:
Նշված դեպքերի ակտիվ մասնակից, ատրճանակից բազմաթիվ կրակոցներ արձակած դիլիջանցի «հեղինակություն» Նավասարդ Աբգարյանն այժմ հետախուզման մեջ է: Մեր տվյալով` քննչական գլխավոր վարչությունը, գլխավոր դատախազությունը, ոստիկանության կազմակերպված հանցագործությունների դեմ պայքարի վարչությունը սույն գործով քննություն են կատարել, սակայն չեն հասել շոշափելի արդյունքների:
Հովիկ Խեչյանը Հանրապետական կուսակցության անդամ է, Իջեւանում գործող ավտոմեքենաների գազալցավորման կայանի հերթափոխի պետն է: Գազալցակայանի տերերից մեկն էլ Տավուշի մարզպետն է:
Կարդացեք նաև
Իջեւանի մեր իրազեկ աղբյուրները հայտնում են, որ Խեչյանների ձերբակալումը կապ ունի նոյեմբերի 13-ին կայացած Իջեւանի քաղաքապետի ընտրություններում քաղաքը 12 տարի անկուսակցական ղեկավարած, այժմ` հանրապետական Վարուժան Ներսիսյանի պարտության եւ 2012 թվականի մայիսին կայանալիք ՀՀ ԱԺ ընտրության հետ: Խեչյաններն Իջեւանում շատ ձայներ կարող են ապահովել, սակայն ՀՀԿ-ում կասկածներ կան, որ նրանք չեն աշխատել Վարուժան Ներսիսյանի համար:
Մեր աղբյուրները պնդում են, որ մարզային իշխանությունները դաս առնելով նոյեմբերի 13-ի ընտրության արդյունքներից`փորձում են իրենց ապահովագրել խորհրդարանական ընտրությունների ընթացքում Իջեւանում ՀՀԿ-ի հնարավոր ձախողումից: Եթե Խեչյանները եկող տարի մայիսի ՀՀ ԱԺ ընտրությունում լավ աշխատելու խոստում տան` Հովիկի առանձնապես խիստ պատիժ չի ստանա:
Պատահական չէ, որ «Արտեմիսի» դեպքից հետո 5 ամիս ազատության մեջ գտնվող Խեչյանները Ամանորի շեմին կալանավորվել են, իսկ դեպքերում հիմնական դեր ունեցած Նավասարդ Աբգարյանը դեռ ազատության մեջ է:
Ոսկան ՍԱՐԳՍՅԱՆ
