Չկա մի պետական ոլորտ Հայաստանի Հանրապետությունում, որ խախտումներ չլինեն, սակայն խախտումների աննախադեպ մեծ ծավալների առումով պետական ոլորտների մեջ 1-ին տեղում կենսաթոշակային հիմնադրամն է: Այս մասին այսօր ասուլիսում հայտարարեց ֆինանսների նախարարության վերահսկողության տեսչության պետ Սոնա Ղարիբյանը: Նրա ներկայացմամբ՝ կենսաթոշակային հիմնադրամի ենթակայության տակ գտնվող թոշակներ վճարող 51 կառույցում ստուգումներ են իրականացվել, եղել են այցելություններ տներ: Ըստ տեսչության պետի. « Համադրելով կենսաթոշակառուների տվյալները «Օվիրի», զագսի եւ մահվան բյուրոյի տվյալների հետ, բացահայտվել են 5,847 կենսաթոշակառուներ, որոնք մոտ 2 տարի բացակայել են Հայաստանից, սակայն այդ 2 տարվա ընթացքում 1.3 միլիարդ դրամի կենսաթոշակների անհիմն վճարումներ են եղել: Բացահայտվեցին 1,288 մահացած անձինք, որոնք ընդգրկված էին վճարման ցուցակներում, եւ որոնց անվամբ վճարվել են 105 միլիոն դրամ կենսաթոշակի եւ թաղման նպաստի ավել գումարներ: 4,602 կենսաթոշակառուներ էլ բացակայում էին բազաներից, բայց նրանց պետբյուջեից վճարվել է 2.3 միլիարդ դրամ»:
Սոնա Ղարիբյանի տվյալներով, խախտումներ են հայտնաբերվել նաեւ պետական եկամուտների կոմիտեի տարածքային բաժիններում. ավելին վճարված կամ թաքցրած հարկեր: Օրինակ՝ Գավառի հարկային տեսչությունում 2 հարկ վճարողներից, որից մեկը Գավառի համալսարանն է, հարկայինը 809 հազար դրամ ավել հարկ է գանձել: Տեսչության պետի վստահեցմամբ՝ իրենք առաջարկել են հարկայինի օրինազանց տեսուչին պատժել:
Ֆիննախի վերահսկողության տեսչությունը ստուգումներ է իրականացրել նաեւ մարզպետարաններում եւ քաղաքային համայնքներում, իսկ որոշ գերատեսչություններում դրանք դեռեւս ավարտված չեն: Այնտեղ, որտեղ «ոտք» է դրել տեսչությունը, պարտադիր միլիոնների խախտումներ է հայտնաբերել:
Նելլի ԲԱԲԱՅԱՆ
