Սեւանա լճի մակարդակի բարձրացման հետեւանքով ափամերձ տարածքներում գործող ոչ միայն զվարճանքի օբյեկտներ ու հանգստյան տներ են մնացել ու մնալու ջրի տակ, այլեւ՝ Սեւանի ավազանի 3 գյուղերի՝ Արծվանիստի, Ծովակնի ու Կարճաղբյուրի տասնյակ տներ: Այսօր այս մասին «Հենարան» ակումբում ասաց ՀՀ նախագահին առընթեր «Սեւանա լճի հիմնահարցերի հանձնաժողովի» նախագահ Վլադիմիր Մովսիսյանը:
Նա ասուլիս էր հրավիրել՝ հանձնաժողովի 2011 թ-ի գործունեությունն ամփոփելու: Այն դիտարկմանը, թե արդեն Կարճաղբյուր գյուղի որոշ բնակելի տներ գրեթե ջրի մեջ են եւ մարդիկ չեն կարողանում մշակել իրենց տնամերձ հողամասերը, պարոն Մովսիսյանը պատասխանեց. «Կարճաղբյուրում 26 ընտանիք են, որոնց անշարժ գույքի թվաքանակը 100-ից անցնում է, ամենացածր տունը գտնվում է 1902 մետր նիշի վրա: Նման՝ 5 տուն կա: Ինչ վերաբերում է ջրի մեջ լինելուն, ապա ասեմ, որ դա ոչ թե Սեւանի այն ջուրն է տներ լցվել, այլ՝ ոռոգման ջուրը, ինչն անսիստեմ օգտագործելու հետեւանք է, առուները չեն մաքրվում, ջուրը վերեւի կետերից ներծծվում է մարդկանց հողամասեր, տներ: Չնայած դրան, ես առաջարկել եմ կառավարությանը , որ առաջին հերթին լուծեն այս գյուղի 5 շենք– շինությունների խնդիրը, որոնք 5-6 տարում կարող են ջրի մեջ հայտնվել, մնացածը գրաֆիկով կլուծվի, քանի որ ամենաբարձր տները գտնվում են 1904 մետր 80 սմ մակարդակի վրա»:
Aravot.am-ի հարցին էլ, թե լճի մակարդակի բարձրացման հետեւանքով քանի՞ գույք եւ որքա՞ն գումար է նախատեսվել հանուն պետական շահի համար տուժած տնտեսվարողների շենք- շինությունները տեղափոխելու եւ նրանց կրած վնասները փոխհատուցելու համար, պարոն Մովսիսյանը պատասխանեց.
Տեղափոխված շինությունների թվում են պոմպակայաններ, էլեկտրական ենթակայաններ եւ գազատար խողովակներ: Անդրադառնալով Սեւանի ավազան Արարատի ոսկու գործարանը տեղափոխելու խնդրին, պարոն Մովսիսյանը վստահեցրեց, որ այդ հարցն օրակարգից հանվել է:
Առաջիկայում հանձնաժողովն աշխատանքներ է տանելու լճի մակարդակը եւս 6 մետրով բարձրացնելու: Ըստ նրա, այս ընթացքում որոշ տեխնիկական խնդիրներ են առաջացել Արփա-Սեւան թունելում, որի մոտ 3, 5 կիլոմետրը գտնվում է վթարային վիճակում: Հանձնաժողովը եկող տարի որոշել է փոխել լճի մաքրման մարտավարությունը. Վլադիմիր Մովսիսյանը գտնում է, որ պետք է ոչ թե ափերը ջրածածկ անել՝ նոր մաքրման աշխատանքներ կատարել, այլ՝ այդ տարածքները բուսականությունից մաքրել եւ նոր միայն թողնել ջրի տակ:
Լուսինե ԲՈՒԴԱՂՅԱՆ
