Արդարադատության նախարարության «Նուբարաշեն» քրեակատարողական հիմնարկի թիվ 33 խցի կալանավոր Արման Դավթյանը դիմել է պատկան մարմիններին եւ չստանալով նրանցից պատասխան չի կարողանում բարձրաձայնել իր նկատմամբ ծավալված ապօրինությունների մասին:
Ա.Դավթյանը հայտնում է, որ հուլիսի 14-ին, առավոտյան ժամը 6-ին, իր վարձակալած բնակարանից բերման ենթարկելով՝ Մաշտոցի բաժնի ոստիկանները իրեն, կնոջը եւ ընկերոջը ստիպել են սուտ ցուցմունք տալ, որ կատարել են բնակարանային գողություններ:
Ըստ թելադրածի, գողոնը Արմանը տվել էր կնոջը՝ Սոնա Մկրտչյանին, վաճառելու նպատակով: «Ինձ խոշտանգելով, նրանք կոտրեցին ձախ ձեռքիս մատները, էլեկտրաշոկով հոսանքի տալով այրեցին մեջքս եւ ստիպում էին, որպեսզի հանձն առնեմ իրենց թվարկած բնակարանային գողությունները: Ես ստիպված ոստիկանների հետ գալիս եմ համաձայնության, որ պետք է գրեմ իրենց թվարկած 16 հատ գողությունները, ասելով, թե ես եմ արել: Մտածում էի, որ կնոջս եւ ընկերոջս դրանից հետո բաց կթողնեն, կճղեն նրանց բացատրությունները: Պատրաստ էի հանձն առնել անգամ սպանության որեւէ դրվագ, միայն թե կնոջս բաց թողնեին»,- հայտնում է Արմանը:
Սակայն, դրան հետեւում է այն, որ Արմանին ուղեկցում են «տուժող» բնակարանները: «Ինձ ասացին որտեղից ինչ է գողացվել, որպեսզի քննիչի հետ փորձարարության ժամանակ մատնացույց կարողանամ անել: Նշեմ, որ ոստիկանները չունենալով որեւէ իրեղեն ապացույց, կանչում են ընկերոջս՝ Արթուրին բաժին, իսկ քրեականի պետը գողացված ավտոմեքենայի բարձրախոսներն էր տալիս, որպեսզի տանեն իմ տանը պահեն, խուզարկության ժամանակ էլ հայտնաբերեն»,- տեղեկացնում է Ա.Դավթյանը:
Կարդացեք նաև
Մեկուսարանում Ա.Դավթյանը հացադուլ է հայտարարել, դիմել է գլխավոր դատախազությանը: Ըստ նրա՝ եկել է իր մոտ քննիչը, առաջարկել, որպեսզի դիմումը ետ վերցնի:
Սակայն գործը հասավ դատարան:
Արմանը նախկինում դատապարտվել է 4 անգամ: Նա սակայն պնդում է, որ ունի անհերքելի ապացույցներ, թե ինչպես են իր վրա Մաշտոցի ոստիկանները սարքել տվյալ գողությունները. «Նշված հանցագործությունները կատարած անձինք գտնվում են ազատության մեջ»,- ահազանգում է նա, եւ վստահեցնում, որ կատարված հանցագործություններում ինքն անմեղ է:
Ռուզան ՄԻՆԱՍՅԱՆ
