Այսօր՝ դեկտեմբերի 26-ին, Էրեբունու վարչական շրջանի Գաջի գործարանի հարևանությամբ գտնվող «Աղի լճում» հայտնաբերվել է «Օպել» մակնիշի ավտոմեքենա։
Ինչպես դեպքի վայրից «Առավոտին» հայտնում է ֆոտոլրագրող Գագիկ Շամշյանը, «Օպել»-ը լճից դուրս բերելու համար շտապ դեպքի վայր են ժամանել Արտակարգ իրավիճակների նախարարության Հայաստանի փրկարար ծառայության Երևանի փրկարարները՝ ջրասուզակներով, որոնց աշխատանքները ղեկավարում էին Երևանի փրկարարական վարչության պետ Մուշեղ Ղազարյանն ու փրկարար ուժերի վարչության պետի տեղակալ, օրվա պատասխանատու Մանվել Ներսիսյանը։
Այս պահին ժամանել են Երևանի ոստիկանության պետ, ոստիկանության գեներալ–մայոր Ներսես Նազարյանը, ոստիկանության Կենտրոնականի բաժնի պետ Սարգիս Մարտիրոսյանը, ոստիկանության Էրեբունու բաժնի պետ Գագիկ Գաբրիելյանը, փորձագետներ։ Այստեղ է նաև Էրեբունու վարչական շրջանի դատախազ Հովհաննես Սուքիասյանը։
Արդեն մեքենան մոտեցվել է ափին հատուկ պարանի միջոցով։ Այս պահին վերամբարձ կռունկով փորձում են ջրից դուրս բերել ավտոմեքենան։
Կարդացեք նաև
Ֆոտոլրագրողը հայտնում է, որ նշված ավտոմեքենան պատկանում է Գարիկ Կիրակոսյանին, որին պատկանում է Երեւանի «Վիվարո» բուքմեյքերական գրասենյակներից մեկը:
Քիչ առաջ ֆոտոլրագրողը հայտնեց՝ մեքենան դուրս բերվեց ջրից, որի մեջ հայտնաբերվեց տիրոջ դիակը՝ գլխի մասում վնասվածքով, իսկ մարմնի վրա կային դանակի բազմաթիվ հարվածներ:
