Les Nouvelles d’Armenie պարբերականի կայքը հայտնում է, որ Ֆրանսիայի Սենատի Սոցիալիստական խմբի նախագահ Ֆրանսուա Ռեբսմանը դիմել է կառավարությանը` Հայոց ցեղասպանության ժխտումը քրեականացնող օրինագիծը Սենատի օրակարգում որքան հնարավոր է շուտ գրանցելու համար:
«Նույնիսկ եթե կան կասկածներ օրինագծի ընտրական նկատառումներով ընդունված լինելու մասին, այսօր վատթարագույնը կլիներ այդ օրինագիծը թաղելը` առաջ բերելով հայկական համայնքի հիասթափությունը թուրքական համայնքի զայրույթը առաջացնելուց հետո», – գրել է Ռեբսմանը այդ առթիվ հատուկ հաղորդագրությունում:
Ֆրանսիայի Ազգային ժողովի կողմից անցած հինգշաբթի օրը ընդունվածօրինագիծը (այն մեկ տարվա բանտարկություն եւ 45 հազար եվրոյի տուգանք է սահմանում Հայոց ցեղասպանության իրականությունը ժխտողների համար) վավերացվելու համար պետք է գրանցվի Սենատում եւ քննարկվի երեսփոխանական գործընթացի ավարտից առաջ` այսինքն նախքան փետրվարի վերջը:
Հայկական օրինագծի ընդունվելուց ի վեր` դրա հեղինակ պատգամավոր Վալերի Բուայեն գտնվում է թուրքական սպառնալիքի տակ, որը ծրագրված է «Գորշ գայլեր» ազգայնական շարժման կողմից: Ներխուժելով Վալերի Բուայեի կայքը` այդ խումբը բռնության, մինչեւ իսկ մահվան սպառնալիքներ է հնչեցրել Բուայեի եւ նրա ընտանիքի հասցեին: Այդ մասին վերջին օրերին տեղեկացնում է BFMTV հեռուստակայանը` ներկայացնելով սպառնալիքի հեղինակների «Ֆեյսբուք»-ի էջը, որտեղ վերջիններս հպարտորեն հայտարարում են այդ մասին:
Իսկ պատգամավոր Վալերի Բուայեն այդ նույն հեռուստակայանին իր բողոքն է հայտարարել` իր ընտանիքի եւ իր անձի հանդեպ արված այս սպառնալիքների առնչությամբ:
Ռուզան ԿՅՈՒՐԵՂՅԱՆ
«Ազատություն» ռադիոկայան
