Թուրքիայի փոխվարչապետ, նախկին արտգործնախարար Ալի Բաբաջանը Ֆրանսիայի նախագահ Նիկոլա Սարկոզիին մեղադրել է Հայոց ցեղասպանության ժխտման համար քրեական պատիժ սահմանող օրինագծի ընդունումը խորհրդարանում թույլ չտալու խոստումը դրժելու մեջ։
«Ֆրանսպրես» լրատվական գործակալության փոխանցմամբ` Բաբաջանը շաբաթ օրը ասել է, թե Սարկոզին հավաստիացումներ է արել Թուրքիայի նախագահ Աբդուլա Գյուլին եւ վարչապետ Ռեջեփ Էրդողանին, որ օրինագիծը տապալվելու է։
«Ես ինքս լսել եմ դա մեր ունեցած համատեղ հանդիպումների ընթացքում։ Իսկ ի՞նչ տեղի ունեցավ անցած շաբաթ։ Ո՞ւր է խոստումը», – հայտարարել է Թուրքիայի փոխվարչապետը` հավելելով. – «Խոստումը հարգելը շատ կարեւոր է քաղաքականության մեջ։ Եթե այդ խոստումը տրվում է պետական գործչի կողմից, ապա դա պարտավորեցնում է պետությանը եւ երկրին»։
Ֆրանսիայի Ազգային ժողովի կողմից Հայոց ցեղասպանության ժխտման համար քրեական պատիժ սահմանող օրինագծի ընդունումը անցած շաբաթավերջին դատապարտել է Սուդանը։ Sudan Tribune պարբերականի վկայությամբ, պաշտոնական Խարթումը իր համերաշխությունն է հայտնել Թուրքիայի հետ։
Կարդացեք նաև
Ազատություն Ռադիոկայան
