Իսրայելի Քնեսեթի Կրթության, մշակույթի եւ սպորտի հարցերով հանձնաժողովի այսօրվա նիստում քննարկել է Հայոց ցեղասպանության ճանաչման եւ ապրիլի 24-ը Իսրայելում Հայոց ցեղասպանության զոհերի հիշատակի օր հայտարարելու մասին հարցը: Ինչպես Մեդիամաքս-ի հետ զրույցում հաղորդել է ՀՅԴ Հայ Դատի Երուսաղեմի գրասենյակի ղեկավար Ժորժետա Ավագյանը, հարցի քննարկումը տեւել է մեկ եւ կես ժամ:
«Նիստի ընթացքում հնչել են մեզ համար դրական ելույթներ պատգամավորների կողմից: Բայց քանի որ ոչ բոլորն են հասցրել արտահայտվել թեմայի շուրջ, որոշվեց հարցի քննարկումը շարունակել մյուս նիստին, որի ժամկետները դեռ հայտնի չեն»,- ասել է Ժորժետա Ավագյանը:
France Press-ն այսօր մեջբերել է Քնեսեթի նախագահ Ռուեվեն Ռեվլինի խոսքերը, ով նիստի սկզբում հերքել է ենթադրություններն այն մասին, որ հարցը հայտնվել է օրակարգում Իսրայելի եւ Թուրքիայի հարաբերություններում առաջացած լարվածության պատճառով: Նա ասել է, որ «մենք չենք ցանկանում օգտվել քաղաքական իրավիճակից` հաշիվներ մաքրելու համար»:
