Ռուսաստանի նախագահ Դմիտրի Մեդվեդեւը համոզված է, որ ներկայումս գոյություն ունի Լեռնային Ղարաբաղի հակամարտության կարգավորման հնարավորություն։
«Այն գուցեեւ միակ հակամարտությունն է հետխորհրդային տարածքում, որը ներկայումս կարելի է կարգավորել։ Ամեն ինչ կախված է կողմերի բարի կամքից, միմյանց փաստարկները լսելու նրանց հնարավորությունից եւ ցանկությունից, եւ ասենք ուղիղ` չեն լինում հեշտ լուծումներ», – ասել է Ռուսաստանի նախագահը Ադրբեջանի հեռուստառադիոյին (AzTV) տված հարցազրույցում։
Մեդվեդեւի խոսքերով` պաշտոնական Մոսկվան հետագայում եւս նպաստելու է հակամարտության խաղաղ կարգավորմանը։ Նա հայտնել է, որ այդ հարցը բարձրացրել է Ադրբեջանի նախագահ Իլհամ Ալիեւի հետ վերջերս կայացած հեռախոսազրույցում, բացի այդ` իր նախաձեռնությամբ վերջին մի քանի տարում կայացել է Հայաստանի, Ադրբեջանի եւ Ռուսաստանի նախագահների 8 հանդիպում։
«Հաջողվել է նաեւ կողմերին ամենայն շիտակությամբ առաջադրել այն հարցերը, որոնց շուրջ նրանց դիրքորոշումները Լեռնային Ղարաբաղի հակամարտության կարգավորման ոլորտում տարբերվում են, առաջադրել ազնվորեն, բաց եւ ներկայացնել սեփական բոլոր փաստարկները», – ռուսաստանյան «Նովոստի» լրատվական գործակալության փոխանցմամբ` ասել է Դմիտրի Մեդվեդեւը։
Կարդացեք նաև
«Ազատություն» ռադիոկայան
