Երեկ` դեկտեմբերի 23-ին, երեկոյան Զանգակատուն հասարակական բարեգործական կենտրոնի երեխաները ներկայացան 2011թ-ի ամփոփիչ միջոցառմամբ: Երգեցին ամանորյա երգեր, պարեցին հայկական ազգային պարեր, փոխանցելով իրենց աշխուժությունն ու ուրախ տրամադրությունը բոլոր ներկաներին: Իսկ երեկոն ավարտվեց տոնական հյուրասիրությամբ: Կենտրոնի սաներից 16 տարեկան Խաչիկ Միքայելյանը գոհ է իրենց միջոցառումից. «Կենտրոնն օգնեց մեզ բացահայտել մեր մեջ թաքնված շնորհները և դրանք ներկայացնել բարձր կատարողականությամբ: Ստացանք դրական լիցքեր, զգացինք մեզ արժեւորված, շոյվեցիքն, երբ ուսուցիչները երգեցին և ասմունքեցին մեզ համար»:
Զանգակատունը գործում է 2001թ-ից Հայաստանի երեք քաղաքներում` Երևանում, Մեծամորում և Վանաձորում: Կազմակերպությունն օգնում է ժամանակավոր խնդիրներ ունեցող ընտանիքներին հաղթահարել դրանք: «Զանգակատան» միջոցով ընտանիքները ստանում են սոցիալական, հոգեբանական, կրթական և հոգեւոր ծառայություններ, իրավաբանական խորհրդատվություն, անհրաժեշտության դեպքում` ուղղորդվում են այլ
կառույցներ:
Զանգակատան Երևանի սոցիալական ծառայությունների համակարգող Նաիրա Քերոբյանը 2011թ-ի արդյունքներ մասին խոսեց մեզ հետ « Այս տարի մեր ծրագրով ամեն եռամսյակում սպասարկեցինք 75 ընտանիք` նրանց 120 երեխաներով: Տարվա ընթացքում կարողացանք լուծել շատ ընտանիքների հիմնախնդիրներ` ինչպես հոգեբանական, այնպես էլ սոցիալական ոլորտում: Տարվա ընթացքում շահառուներին տրամադրվել է նաև հումանիտար օգնություն`հիգիենիկ պարագաներ, սնունդ և հագուստ: Մենք օգնում ենք ուժեղանալ հայ ընտանիքներին, ինչպես ասում է Մուրացանը. «Զորավոր է այն ազգը, որն ունի զորավոր ընտանիքներ»»:
Լիլիթ Շարբաթյան
