Իսկ պատժաչափը մնում է նույնը
Արդարադատության նախարարության «Նուբարաշեն» քրեակատարողական հիմնարկի կալանավոր, ցմահ ազատազրկման դատապարտված Մհեր Ենոքյանը դիմել էր դատարան՝ ՀՀ քրեական օրենսգրքի մայիսի 23-ի փոփոխություններից հետո հոդվածների համապատասխանեցման եւ իրենց պատժաչափի վերանայման հայցով: Մհերը 16 տարի ազատազրկված է:
Ինչպես ցմահ ազատազրկվածների հետ կապված տեղեկացրել ենք, վերոհիշյալ փոփոխություններով սահմանվել է նոր առավելագույն պատժաչափ՝ նախկին 15-ի փոխարեն 20 տարի, ապա՝ ցմահ ազատազրկում: Սակայն դատավարությունները կայանում են, իսկ պատժաչափերը մնում են անփոփոխ:
Ըստ Էրեբունի-Նուբարաշեն ընդհանուր իրավասության դատարանի նոյեմբերի 14-ի դատավճռի, մասնակի բավարարվել էր Ենոքյանի հայցը՝ համապատասխանեցվել էին հոդվածները, իսկ պատժաչափի փոփոխություն չէր եղել:
Առանց Մհեր Ենոքյանի մասնակցության՝ վերաքննիչ քրեական դատարանում լսվեց նրա բողոքը: Այն ներկայացրեց Փաստաբանների պալատի անդամ, փաստաբան Վահագն Մանուկյանը: Բողոքը մերժվեց:
Փաստաբան Վ. Մանուկյանը մտադիր է դատավճիռը բողոքարկել Վճռաբեկ դատարանում: «Առավոտի» տեղեկություններով, ցմահ ազատազրկման դատապարտված Տիգրան Ավետիսյանը մտադիր է եւս դիմել դատարան՝ իր դատավճռի հետ կապված: Նա Գերագույն դատարանի քրեական գործերով կոլեգիայի կողմից 11.12.1997թ.-ին դատապարտվել է մահապատժի, ապա՝ 08.08.2006թ.-ին Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավճռով ցմահ ազատազրկման: Ի դեպ, ՀՀ քրօրի 301 հոդվածը, որով դատապարտվել է Ավետիսյանը, քաղաքական է՝ իշխանությունը զավթելու, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերի համար:
Ռ. Մ.
«Առավոտ» օրաթերթ
