Իջեւանի քաղաքապետի նոյեմբերի 13-ին ընտրություններում հաղթեց ԲՀԿ անդամ Վարդան Ղալումյանը: Դեկտեմբերի 22-ից նորընտիր քաղաքապետը փորձում է անցնել իր պարտականությունների կատարմանը, սակայն խոչընդոտների է հանդիպում:
Նախկին քաղաքապետ Վարուժան Ներսիսյանը համարում է, որ ինքը մինչեւ դեկտեմբերի 24-ը պետք է պաշտոնավարի, քանզի 2007 թվականի դեկտեմբերի 16-ին կայացած Իջեւանի քաղաքապետի արտահերթ ընտրություններից հետո այդ օրն է իր աշխատանքի ընդունման հրամանը եղել:
Վարդան Ղալումյանն էլ հղում է անում ՏԻՄ օրենքի 7-րդ հոդվածին, ըստ որի՝ արտահերթ ընտրությունների միջոցով ընտրված համայնքի ղեկավարն իր պաշտոնը ստանձնում է ընտրությունների արդյունքների հրապարակման հաջորդ օրը:
Կարդացեք նաև
Վարդան Ղալումյանը դեկտեմբերի 22-ին գրավոր դիմել է Տավուշի մարզպետին, որպեսզի մարզպետարանի ներկայացուցիչը իր հետ գա Իջեւանի քաղաքապետարան եւ նրա ներկայությամբ կատարվի պաշտոնի հանձնում-ընդունում: Դեկտեմբերի 23-ին Իջեւանում չէին ոչ Վարուժան Ներսիսյանը, ոչ էլ մարզպետ Արմեն Ղուլարյանը: Մեր տվյալներով, նրանք մասնակցում էին ԱԺ նախկին նախագահ Հովիկ Աբրահամյանի հորեղբոր հուղարկավորությանը:
Իջեւանում հիմա իշխանությունը «օդից կախված է»: Մեր տեղեկությամբ, համայնքի բյուջեն գրեթե դատարկ է՝ բյուջեում ընդամենը 300 հազար դրամ է մնացել, նաեւ շատ պարտքեր ու այս պատճառով վտանգված է Տավուշի մարզկենտրոնում Ամանորի հանդեսի կազմակերպումը: Իսկ Տավուշի մարզպետարանը փաստացի չի խառնվում այս ամենին:
Ոսկան ՍԱՐԳՍՅԱՆ
