«Գյումրու քաղաքապետ Վարդան Ղուկասյանը հենց Գյումրիում կառուցում է բազմամիլիոնանոց հյուրանոց, մինչդեռ երկրաշարժից տուժած գյումրեցիներին դեռ չեն հատուցել բնակարաններով»,- այսօր «Հենարան» ակումբում տեղի ունեցած ասուլիսի ժամանակ ասաց Տարածաշրջանային հետազոտությունների կենտրոնի տնօրեն Ռիչարդ Կիրակոսյանը: Ըստ նրա, Հայաստանում տնտեսական մրցակցություն չկա, արտաքին ներդրումները սահմանափակ են: Հիշեցնելով Նարեկացի մշակույթի կենտրոնի հիմնադիր Նարեկ Հարթունյանի հետ կատարվածը՝ պարոն Կիրակոսյանը մտավախություն հայտնեց, որ արտասահմանցի ու սփյուռքահայ գործարարներն էլ չեն ցանկանա Հայաստանում ներդրումներ անել. «Սա բացասական ուղերձ է: Տրանսֆերտները ՀՆԱ-ի 13 տոկոս են կազմում»:
Պարոն Կիրակոսյանի գնահատմամբ, բավականին թույլ է 2012 թվականի պետական բյուջեն. «Բյուջեն խոստանում է ապահովել 1,1 միլիարդ դրամ հարկերից, եւ հարկահավաքի այս նոր ձեւը լուրջ մարտահրավեր է օլիգարխների համար: Ո՞վ կհաղթի՝ կառավարությո՞ւնը, թե՞ օլիգարխները. նրանք այնքան են ներգրավվել համակարգում, որ լուրջ վտանգ են պետության համար»:
Արփինե ՍԻՄՈՆՅԱՆ
