Բոլորն Ամանորին սպասում էին իրենց տանը, իսկ Տաթեւիկենց ընտանիքը՝ հիվանդանոցում. Տաթեւիկը պետք է ծնվեր: Ընտանիքը Ամանորի եւ նոր ծննդի շնորհավորանքներ եւ բարեմաղթանքներ հենց հիվանդանոցում էլ ընդունեց:
«Ամանորը ընտանեկան համընդհանուր օր է, իսկ ծնունդը մենակ քոնն է: Բոլորի ուշադրության կենտրոնում դու ես», – ասում է Տաթեւիկ Կյանդարյանը : Նրա համար Ամանորը կրկնակի տոն է. 1994 թվականի հունվարի 1-ին ծնվեց նա, մայրը` Արմինե Սիմոնյանը. չի կարողանում բացատրել այդ օրվա իր զգացմունքները. «Երջանկացա, որ էլի մայրացա»:
Տաթեւիկը սովորում է Ֆրանսիական համալսարանի իրավաբանական ֆակուլտետում, հայ Երիտասարդական կառավարության անդամ է, շատ կենսուրախ մարդ է , չի սիրում նեղացկոտներին. «Սիրում եմ երգել, պարել, ժամանակ անցկացնել ընկերներիս հետ»: Ամենասիրելի տոներից մեկն էլ Ամանորն է. «Մանավանդ, որ տոնս կրկնակի է դառնում»:
Բոլորս էլ Ամանորին լինում ենք ուրախ, քանի որ դիմավորում ենք նոր տարին: Տաթեւիկի ուրախությունը մի փոքր անսովոր է. «Ամեն տարին նշելիս զգում եմ, որ ավելի հասուն տարիքով եմ դիմավորում Ամանորը »: Ու չի փոխի իր ծննդյան օրը նույնիսկ հաշվի առնելով այն, որ Ամանորյա և ծննդյան նվերը մեկն է լինում, ասում է չի էլ տխրում: Հիշում է մի Ամանորյա գիշեր. «Միշտ երազում էի փոքրիկ շնիկի մասին, բայց քանի որ փոքր էի, ծնողներս չէին գնում: Ծննդյանս օրը մտա սենյակ, ու տեսա մեծ, փափուկ խաղալիք շուն. չնայած իսկական չէր, բայց շատ էի հուզվել»:
Տաթեւիկը իր հասակակիցներին Ամանորին մաղթեց երազանքների իրականացում, հաջողություն. «Իսկ փոքրիկներին ուրախ, անհոգ, ժպիտներով ու գույներով լի մանկություն»:
Այս տարի Տաթեւիկը նշում է իր 18 ամյակը:
Մելանյա Հարությունյան
