Հոկտեմբերի 2-ին Այրումի մոտ տեղի ունեցած սողանքից զոհված 5 անձանց ընտանիքներին նոյեմբերի 8-ին եւ 9-ին պետական բյուջեից տրվել է 1-ական միլիոն դրամ աջակցություն :
Սողանքից տուժել է նաեւ Տավուշի մարզի բնակիչներին պատկանող 12 ավտոմեքենա: Քարի եւ հողի հսկա զանգվածի տակ են մնացել այրումցի 3 ընտանիքների պտղատու այգիները: Բնական աղետից նյութապես տուժածներին ֆինանսական փոխհատուցում հատկացնելու վերաբերյալ վարչապետ Տիգրան Սարգսյանը հանձնարարական էր տվել Տավուշի եւ Լոռու մարզպետներին: Դեկտեմբերի 21-ին սողանքից ջարդված ավտոմեքենաների տերերին տրվել է փոխհատուցում: Սակայն «փոխհատուցում» բառն այս դեպքում այնքան էլ տեղին ու ճիշտ չէ: Մեր տվյալներով` յուրաքանչյուր ավտոմեքենայի տիրոջը տրվել է 260 հազար դրամ: Քարի եւ հողի հսկա զանգվածի տակ ճզմված մեքենաներն այլեւս պիտանի չեն օգտագործման համար, ավտոմեքենաների տերերի նյութական կորուստը մեծ է:
Տավուշի մարզի Զորական գյուղի բնակիչ Սերյոժա Բաբաջանյանը միակն է, որի ավտոմեքենան դեռեւս դուրս չի բերվել հողի տակից: Նա ասաց, որ 1996 թվականի արտադրության «Օպել վեկտրան» գնել է 1 տարի առաջ՝ 7 հազար դոլարով: Սերյոժան խիստ դժգոհ է եւ ցանկացել է գումարից հրաժարվել, սակայն «մեքենան գնելու համար բանկում վարկ եմ վերցրել, այդ գումարով գոնե տոկոսները կփակեմ»,-ասաց Զորականի բնակիչը:
Այրում քաղաքի մի բնակիչ էլ նույնքան` 260 հազար դրամ է ստացել 6 հազար դոլար շուկայական արժեք ունեցող մեքենայի համար:
Կարդացեք նաև
Ոսկան ՍԱՐԳՍՅԱՆ
