Հոկեյի ազգային լիգայի (NHL) եւս չորս պրոֆեսիոնալ հոկեյիստներ համալրեցին, այսպես կոչված «Concussion Team»-ի կազմը: Սա խորհրդանշական հավաքական է, որում տեղ ունենում են միայն հանդիպումների ժամանակ գլխուղեղի ցնցում ախտորոշումով պրոֆեսիոնալները: Այս առումով, արդեն իսկ 30 հոգիանոց այդ «հավաքականն» ամենաաստեղայինն է աշխարհում, որին «անդամագրվել» չի ցանկանում ոչ մի հոկեյիստ: Դրա համար բոլորն էլ անում են ամեն բան, որպեսզի բժիշկներից թաքցնեն այդ վնասվածքի նշանները՝ վտանգելով իրենց առողջությունը: Իսկ ինչո՞ւ:
Հարցի պատասխանը գիտի «Ֆիլադելֆիա» ակումբի դարպասապահ Սերգեյ Բոբրովսկին, որը «Սովետսկի սպորտի» թղթակցին ասել է. «Ես չեմ զարմանում: NHL-ը հսկայական մրցակցություն է եւ յուրաքանչյուրը «դողում» է թիմում իր տեղի համար, որն ամեն վայրկյան կարելի է կորցնել: Դրա համար էլ տղաները հաճախ սառցադաշտ են մտնում դեռ ամբողջովին չապաքինված»: Իսկ բժիշկներն ու փորձագետները ահազանգում են, որ ճիշտ է, հոկեյը մեծ փողեր է, աշխատանք, որը կորցնել ոչ ոք չի ցանկանում, բայց առողջությունն ավելի թանկ է: Հակառակ դեպքում, այդ հոկեյիստները հարկադրված են լինելու կարիերայի ավարտից հետո տարիների վաստակած ամբողջ գումարը ծախսել բուժվելու վրա: Բացառված չէ՝ նաեւ անօգուտ:
Աշոտ ՀԱԿՈԲՅԱՆ
