Ինչպես տեղեկացրել ենք, երեկվանից Գյումրիում սկսել են դատել «Հայինկասացիա» ՓԲԸ-ի վարորդ-ինկասատոր, 25-ամյա Հայկ Չերնամորյանին, ով մեղադրվում է գայթակղվելու ու սեփական հիմնարկի մեքենաներից մեկի միջից 100 հազար դոլարանոց պարկ թռցնելու մեջ: Նշենք, որ նա կապարակնքված գումարը Ուազ մակնիշի մեքենայից վերցրել էր `տեսնելով, որ այն անփույթ շպրտված է: Սակայն վերցնելն ու ոստիկաններին ազնվորեն խոստովանելը մեկ էր եղել: Նույն ազնվությամբ, ավելին` իր արածից կարմրելով, 25-ամյա երիտասարդը զղջաց նաև դատարանում: Այսօր հայտնի դարձավ, որ դատավոր Էդուարդ Մանուկյանը նրան 4 տարվա ազատազրկման է ենթարկել: Նկատենք, որ կապարակնքված պարկը Ղորղանյան փողոցի մեջտեղում անտեր ու անտիրական թողնելու համար «Հայինկասացիայի» ներկայացուցիչներից, և ոչ մեկը մինչև օրս պատասխանատվության չի ենթարկվել: Քրեական գործի մեջ թեև նշվում է, որ ինկասատորները իրենց գործում թերացել են, փողով կապոցը «Ուազ» մակնիշի մեքենայի մեջ են թողել իրենց պարտականությունների հանդեպ ցուցաբերած անփույթ վերաբերմունքի պատճառով, այդուհանդերձ նրանցից և ոչ մեկի դեմ քրեական գործ չի հարուցվել: Այս դեպքից անմիջապես հետո «Հայինկասացիա» ՓԲԸ-ի Գյումրու բաժնի ղեկավար Ալբերտ Պապոյանը թեև հեռացվեց պաշտոնից. կապարակնքված պարկերը նրա անմիջական հսկողության տակ էր, ինքն էր բերել մայրաքաղաքից, սակայն, մեր տեղեկություններով, վերջինս նույն համակարգում նորից վերականգնվել է աշխատանքի, իհարկե այս անգամ ոչ թե պետ, այլ որպես հասարակ ինկասատոր:
Նունե ԱՐԵՎՇԱՏՅԱՆ
