Եվրամիության հարցերով Թուրքիայի նախարար Էգեմեն Բաղըշը զգուշացրել է, որ թուրք ժողովուրդը կարող է ինքնուրույն որոշում կայացնել այն հարցի շուրջ, թե արդյոք պետք է բոյկոտել ֆրանսիական ապրանքներն այնպես, ինչպես ժամանակին բոյկոտել են իտալական ապրանքները:
«Հուրիեթ» պարբերականի վկայությամբ, Բաղըշն ասել է, թե Ֆրանսիայի կողմից Հայոց ցեղասպանության հերքումը քրեականացնող օրինագծին Թուրքիայի ժողովուրդն արձագանքելու է առանց երկրի կառավարության որևէ մասնակցության:
«Անցյալում տեսել ենք երկրի ժողովրդի արձագանքն Իտալիայի նկատմամբ, որտեղ արտադրված գինիները թափվել են փողոց, իսկ վերարկուներն ու փողկապները՝ այրվել», – ասել է Բաղըշը՝ հավելելով. «Որևէ առաջարկություն անելու կարիքը չկա՝ ժողովուրդ ինքն է որոշում կայացնում»:
Բաղըշն ասել է, որ Հայոց ցեղասպանության հերքումը քրեականացնող օրինագիծն ընդունելուն ի պատասխան թուրքերը դադարեցնելու են ֆրանսիական ապրանքների սպառումը:
Կարդացեք նաև
Թուրքիայի գիտության, արդյունաբերության և տեխնոլոգիայի հարցերով նախարար Նիհաթ Էրգյունն ասել է, որ Թուրքիան ամենայն հավանականությամբ, էմբարգոյի որևէ քաղաքականություն չի որդեգրելու Ֆրանսիայի նկատմամբ և միջազգային պայմանագրեր չի խախտելու:
«Ֆրանսիան սակայն պետք է հաշվի առնի, որ կարող է անհարմար դրության մեջ հայտնվել՝ թուրքական հասարակության տեսակետից», – ասել է Թուրքիայի գիտության, արդյունաբերության և տեխնոլոգիայի հարցերով նախարարը:
Ամերիկայի Ձայն
