«Խորհրդային երկրների շարքում Հայաստանը ժողովրդավարական առումով զիջում է միայն Վրաստանին, մնացած բոլոր երկրներից Հայաստանը մեկ քայլ առաջ է: Ժողովրդավարության ուղղությամբ 2011 թվականին բավական գործընթաց իրականացվել է եւ «Էկոնոմիստի» արդյունքներն այնքան էլ իրականությանը չեն համապատասխանում»,- նման կերպ մեկնաբանեց ՀՀԿ խմբակցության քարտուղար Գագիկ Մելիքյանը բրիտանական «Էկոնոմիստ» հանդեսի՝ անցյալ շաբաթ ներկայացրած նոր զեկույցի գնահատականը, ըստ որի Հայաստանը 2011 թվականի ընթացքում ժողովրդավարության առումով փոփոխություն չի ունեցել:
«Մեկ ամսագիր կամ մամուլի միջոց չէ, որ կարող է տալ Հայաստանի ժողովրդավարության գնահատականը՝ համապատասխանու՞մ է, թե՞ ոչ: Գիտենք նաեւ, թե որտեղից են ֆինանսավորվում նման լրատվամիջոցները, ճիշտ է միջազգային է, բայց չի նշանակում, որ անկախ է: Իսկ անկախները Հայաստանին տվել են բավականին բարձր ժողովրդավարական գնահատական»,- ասաց Հանրապետական պատգամավորը:
