Երեկ մենք գրել էինք, որ երեւանյան խանութներում հայտնվել է ադրբեջանական սխտոր։
Ի պատասխան «Հայոց Աշխարհ»-ի հարցման` ՊԵԿ-ը տեղեկացնում է, որ 2011թ. հունվար-նոյեմբեր ժամանակահատվածում Հայաստանի Հանրապետություն է ներմուծվել 48 110 կգ սխտոր հետեւյալ երկրներից. Չինաստան, Վրաստան, Հունաստան:
Համաձայն «ՀՀ մաքսային օրենսգրքի» 105-րդ հոդվածի` Հայաստանի քաղաքացիները կարող են առանց մաքսատուրք վճարելու որպես ուղեկցող բեռ Հայաստանի մաքսային սահմանով տեղափոխել ապրանքներ, որոնց ներմուծման համար մաքսատուրքի դրույքաչափը սահմանված չէ 0 տոկոս, եւ որոնց ընդհանուր քաշը չի գերազանցում 50 կիլոգրամը, իսկ ընդհանուր մաքսային արժեքը` 150 հազար դրամը: Նախատեսված արտոնությունից ֆիզիկական անձինք կարող են օգտվել 180 օրը մեկ անգամ:
Ինչ վերաբերում է հայկական շուկայում հայտնված ադրբեջանական սխտորին` այդ փաստի առնչությամբ ՊԵԿ-ն ուսումնասիրություն է իրականացնում, որի արդյունքների մասին կտեղեկացնի լրացուցիչ:
«Հայոց աշխարհ»
