Ամբողջ աշխարհում, համենայնդեպս բոլոր զարգացած երկրներում, Ամանորի շեմին ապրանքների գները նվազում են, իսկ Հայաստանում ճիշւո հակառակն է՝ արդեն մեկ ամիս առաջ համատարած թանկացումներ են անում։ Ո՞րն է պատճառը. սկսենք սկզբից։ Հայտնի կանոն է, գները ձեւավորվում են առաջարկի եւ պահանջարկի միջոցով։ Սակայն որոշակի գների աճը, եւ մանավանդ առաջին անհրաժեշտության ապրանքների դեպքում, միշտ էլ զգայուն է այն հասարակության համար, որտեղ թոշակները չեն համապատասխանում սպառողական զամբյուղին, եւ նվազագույն աշխատավարձը երկու անգամ ցածր է սպառողական զամբյուղից։ Իսկ մեզ մոտ առաջարկը ձեւավորվում է եւ հատկապես առաջին անհրաժեշտության ապրանքների, եւ էներգակիրների համար, օլիգոպոլ սկզբունքների հիման վրա։ Հետեւաբար պարզ է, որ հնարավորությունների եւ միմյանց հետ պայմանավորվածության, ինչպես նաեւ պահանջարկի աճի դեպքում են գները սկսում աճել։ Մեզ մոտ այս սկզբունքից հատկապես օգտվում են ներկրողները, որոնք հայտնի մոնոպոլիստներ են։ Մինչդեռ մրցակցային վիճակում, եթե պահանջարկն աճում է, ապա ապրանքների քանակն էլ է աճում, իսկ օլիգոպոլ վիճակում ավելի հեշտ միջոց է գների բարձրացումը:
Աշոտ ԹԱՎԱԴՅԱՆ
«Հրապարակ»
