«2010 թվականին ժողովրդավարության առումով Հայաստանում փոփոխություններ գրանցվել են: Քաղաքականությունը, որն իրականացվել է այս տարվա ընթացքում, ապացուցում է, որ այո’, մենք մի քանի քայլ այսօր առաջ ենք նաեւ մեր Ընտրական օրենսգրքով եւ այն քաղաքականության մշակումով, որն այսօր կիրառվում է: Թե’ ընդդիմություն-իշխանություն համատեքստում, թե’ լրատվամիջոցների աշխատանքի գնահատականի առումով, թե’ դեպի եվրոպական արժեքներ քաղաքականության հիմքում իրականում գնահատականը շատ ավելի բարձր է, քան տվել է «Էկոնոմիստը»,- անդրադառնալով բրիտանական հանդեսի ՝անցյալ շաբաթ ներկայացրած նոր զեկույցին, Aravot.am-ին ասաց ԱԺ ՀՀԿ խմբակցության պատգամավոր Կարեն Ավագյանը:
Հիշեցնենք, որ նշված զեկույցում Հայաստանը կրկին դասվել է հիբրիդային ռեժիմ ունեցող երկրների շարքում։ Այդ երկրներում, ըստ «Էկոնոմիստ»-ի, ընտրությունները, որպես կանոն, ուղեկցվում են էական խախտումներով, կոռուպցիան գրեթե համատարած է, օրենքի իշխանությունն ու քաղաքացիական հասարակությունը` թույլ։ Նման ռեժիմներին բնորոշ են նաեւ լրագրողների նկատմամբ հալածանքները, դատական համակարգն անկախ չէ:
Կ. Ավագյանի համար Հայաստանին հիբրիդային երկրների շարքում դասելն ընդունելի չէ. «Ավելի շատ կնախընտրեի անցումային շրջաններին բնորոշ պետությունների գնահատականը: Զեկույցում առանձին կար նաեւ ավտորիտար երկրների շարք, որում, բարեբախտաբար, Հայաստանը չի ընկել»:
Կարդացեք նաև
Հանրապետական պատգամավորը հավաստիացնում է, որ ապագայում Հայաստանում անցկացվելու են ժողովրդավար եւ թափանցիկ ընտրություններ. «Նախորդ ընտրությունների գնահատականը տվել են բոլոր միջազգային կառույցները, եւ գնահատականը իրականում եղել է շատ բարձր: Եզրակացություններում ներկայացվել է, որ մի քանի քայլ առաջ է ամբողջ ընտրական պրոցեսում, ավելի ժողովրդավար, թափանցիկ ու տեսանելի: Այն ժամանակ ես չեմ հիշում, որ «Էկոնոմիստը» գնահատած լինի մեր ընտրությունները»:
Ի տարբերություն Հանրապետական պատգամավորի լավատեսական տեսակետների, Aravot.am-ի փոքր հարցումը մեր համաքաղաքացիների շրջանում հակառակ պատկերն արձանագրեց: Հարցվածները կարծում են, որ զեկույցը հայաստանյան իրականությունը մեղմ է ներկայացրել, որ մեր երկրում ժողովրդավարություն չկա, ընտրությունները կեղծվել ու կեղծվելու են, մարդկանց իրավունքներն էլ շարունակելու են խախտվել:
Տեսակետներն ու մեկնաբանությունները՝ տեսանյութում:
Լուսինե ԽԱՉԱՏՐՅԱՆ
