Հայ-թուրքական արձանագրությունները տապալվել են Թուրքիայի պատճառով: Դրանք արդեն կարելի է մահացած համարել եւ պետք չէ կյանքի կոչել: Այսօր «Դե ֆակտո» ակումբում լրագրողների հետ զրույցում հայտնեց Հայոց Ցեղասպանության թանգարան-ինստիտուտի տնօրենի ժամանակավոր պաշտոնակատար Հայկ Դեմոյանը: Ըստ նրա, միջազգային լսարանը նույնպես խոսում է, որ Թուրքիան է մեղավոր, հայ-թուրքական արձանագրությունները տապալվեցին, քանի որ այդ երկիրն անընդունելի պայմաններ էր դնում. «Թուրքիայի հետ նման նոր փաստաթղթի կնքումը անիմաստ է, իսկ մեր ստորագրությամբ փաստաթղթով հնարավոր չէ շարունակել գործընթացը` պետք է հետ վերցնել ստորագրությունը»:
Խոսելով ցեղասպանության ճանաչման գործընթացի մասին, պարոն Դեմոյանը ասաց, որ այն չի կարող կանգ առնել. «Տարին դրական էր արտաքին քաղաքականության մեջ ցեղասպանության լայնամասշտաբ քարոզչության եւ դրա պտուղները քաղելու իմաստով: Հայոց Ցեղասպանության ճանաչումը ունի իր ուրույն տրամաբանությունը, ուստի շարունակական է լինելու, ինչքան էլ որ Թուրքիան հզոր լինի, ունենա հզոր բանակ, տարածաշրջանում կարեւոր դերակատարություն: Կարճ ասած՝ ցեղասպանության միջազգային ճանաչման գործընթացը դատապարտված է շարունակական լինելու: Թուրքիայի կողմից ցանկացած հակաքայլ, հոխորտանք, անարդյունք է լինելու, իսկ հայկական կողմն էլ հաջողության կհասնի, եթե լինի հայաստանյան, սփյուռքահայ, օտարերկրացի մասնագետների մաքուր ու համատեղ աշխատանք»:
Ինչ վերաբերում է այն խոսակցություններին, որ ցեղասպանության 100-ամյակը լրանալուց հետո Հայաստանն այլեւս իրավունք չի ունենա ցեղասպանության ճանաչման գործընթացը շարունակել, պարոն Դեմոյանի պնդմամբ. «Դա ամրագրված չէ որեւէ միջազգային եւ իրավական փաստաթուղթում»: Նրա կարծիքով` ցեղասպանության ժխտումը եվրոպական երկրներում պետք է լինի պատժելի, քանի որ ժխտելը ռասիստական մոտեցում է ու վիրավորում է ցեղասպանության զոհերի, ինչպես նաեւ վերապրողների հիշատակը:
Հայկ Դեմոյանը նշեց, որ Հայոց Ցեղասպանության 100-ամյա տարելիցի հետ կապված պետական հանձնաժողով է ստեղծվել, որի նախագահը ՀՀ նախագահն է. «Լինելու են շարժական ցուցադրություններ, շարժական շուրջ 30 թանգարանների բացում աշխարհի տարբեր երկրներում՝ մոտակա 3 տարիների ընթացքում, թեման լուսաբանվելու է նորովի, նոր մոտեցմամբ»:
Կարդացեք նաև
Անուշ ԽԵՉՈՅԱՆ
