Այսօր «Դե ֆակտո» ակումբի հյուրն էր Հայոց Ցեղասպանության թանգարան-ինստիտուտի տնօրենի ժամանակավոր պաշտոնակատար Հայկ Դեմոյանը: Նրա պաշտոնավարման 5 տարին լրացել է, եւ առաջիկայում սպասվում են նոր ընտրություններ, այդ պատճառով էլ ներկայումս պարոն Դեմոյանը ոչ թե տնօրեն է, այլ ժամանակավոր պաշտոնակատար:
Խոսելով Ադրբեջանի մասին՝ Հայոց Ցեղասպանության թանգարան-ինստիտուտի տնօրենի ժամանակավոր պաշտոնակատարն ասաց, որ թեեւ Ադրբեջանը հասավ իր ուզածին` դառնալով ՄԱԿ-ի Անվտանգության խորհրդի ժամանակավոր անդամ, բայց հունվարի 1-ից, երբ իր պարտականությունների կատարմանը ձեռնամուխ կլինի. «Ադրբեջանի իշխանությունը իր իսկ համար վտանգավոր մի հաշվիչ է միացնելու, քանի որ 2 տարի հետո Ադրբեջանը իր ժողովրդին, հասարակությանը պետք է բացատրի` թե ինչո՞ւ նման բարձունքի հասնելու դեպքում ղարաբաղյան խնդիրը չկարողացավ լուծել»:
Նշենք, որ պարոն Դեմոյանը 2 տարի առաջ հայկական հեռուստաեթերի սերիալներում առկա բռնությունների դեմ պայքար էր նախաձեռնել, որը միայն այդ ժամանակ արդյունքներ տվեց, հետագայում բռնության տեսարաններով հարուստ սերիալները շարունակվեցին նկարահանվել եւ ցուցադրվել: Թե ինչ կարծիքի է նա մերօրյա սերիալների մասին, դիտեք՝ տեսանյութում:
Անուշ ԽԵՉՈՅԱՆ
