«Աշտարակ կաթ» ընկերության տնօրեն Ստեփան Ասլանյանն այսօր «Նովոստի Արմենիա» ակումբում տեղի ունեցած մամուլի ասուլիսի ժամանակ հայտնեց, որ ընկերության ավանդական եւ «Կովիկ» տեսակի արտադրատեսակների՝ կաթի, մածունի, թթվասերի, կաթնաշոռի մեջ բացակայում են բուսական յուղերը: Նրա խոսքերով, կան արտադրատեսակներ՝ քաղցր պանրիկ, սփրեդ, հալած պանրիկ, պաղպաղակ, որոնց բաղադրության մեջ անհրաժեշտ է բուսական յուղի առկայությունը, ինչի մասին իրենց տվյալ ապրանքատեսակի վրա կա մակնշում:
Հիշեցնենք, որ մի քանի օր առաջ Տնտեսական մրցակցության պաշտպանության պետական հանձնաժողովը կաթնամթերք արտադրող 3 ընկերությունների մեղադրել էր, որ իրենց կաթնամթերքի մեջ օգտագործել են օրենքով արգելված բուսական յուղեր: Սակայն, «Աշտարակ կաթի» տնօրենը վստահեցնում է, որ այդ մեղադրանքներն անհիմն են. «Ես չունեմ ոչ մի լաբորատոր հետազոտության արդյունք, նույնիսկ վստահ չեմ, որ հետազոտություն է կատարվել»:
Պարոն Ասլանյանի այլ հիմնավորումների մասին կարդացեք վաղվա «Առավոտում»
Անուշ ԽԵՉՈՅԱՆ
