Հյուսիսային Կորեայի պետական հեռուստատեսությունը հաղորդել է երկրի առաջնորդ Քիմ Չեն Իրի 69 տարեկան հասակում վախճանվելու մասին:
Պետական հեռուստատեսությունը հայտնել է, որ Քիմ Չեն Իրը վախճանվել է «ֆիզիկական և մտավոր աշխատանքով գերծանրաբեռնված լինելու պատճառով»:
Որոշ հաղորդագրությունների համաձայն, Քիմ Չեն Իրի մահվան պատճառն է դարձել սրտի կաթվածը:
Կարդացեք նաև
Քիմ Չեն Իրը զբաղեցրել է Հյուսիսային Կորեայի ղեկավարի պաշտոնը 1994 թվականից՝ իր հայր Քիմ Իր Սենի մահվանից հետո:
Հյուսիսային Կորեայի վախճանված առաջնորդի կյանքի մասին արժանահավատ տեղեկությունները սակավ են, քանի որ վերջինս քիչ է հանդես եկել հանրության առջև, և իր ելույթները շատ քիչ են հեռարձակվել:
Քիմ Չեն Իրին հիմնականում հիշել են Հյուսիսային Կորեայի միջուկային ծրագրին մեծ թափ հաղորդելու կապակցությամբ, ինչը վերջինս իրականացրել է այն ժամանակ, երբ Հյուսիսային Կորեայում սովից տառապում են միլիոնավոր մարդիկ:
Անցյալ տարի Քիմ Չեն Իրը չորսաստղանի գեներալի կոչում է շնորհել իր կրտսեր որդի Քիմ Չեն Ուլին՝ ամենայն հավանականությամբ փորձելով շարունակել աշխարհի կոմունիստական ընտանեկան միակ դինաստիայի երրորդ սերունդը:
Վերլուծաբանների համաձայն, դեռևս հայտնի չէ, արդյոք Քիմ Չեն Իրի մահվանից հետո Հյուսիսային Կորեայում բարձրաստիճան գեներալների թվում կսկսվի իշխանության համար պայքարը, թե այս երկրում ևս մեկ անգամ կկատարվի իշխանության «սահուն» փոխանցում:
«Ամերիկայի ձայն»
